–डा. डीआर उपाध्याय
काठमाडौंमा केही व्यापारीहरूले मानव स्वास्थ्यमाथि गम्भीर खेलबाड गर्दै म्याद सकिएका अखाद्य वस्तुहरूमा नयाँ म्याद राख्दै बिक्री वितरण गरेको समाचार बाहिर आएको छ । काठमाडौंका बिभिन्न स्थानबाट प्रहरी प्रशासनले त्यसरी म्याद गुज्रिएका बिस्कुट, हर्लिस, चकलेट, जुस लगायतका वस्तु बरामद गरेको छ । उनीहरुले कोरोना भाइरस सङ्क्रमणको मौका छोपेर मानव स्वास्थ्यमाथि गम्भीर खेलबाड गरेका छन् । यो ठूलो अपराध हो । त्यस्ता व्यापारीहरूलाई कडा भन्दा कडा कारवाही हुनु पर्छ । आम उपभोक्तामाथि यसरी खेलवाड गर्न मिल्दैन । यस बिषयमा सरकारले कडा कदम चाल्नु पर्ने आवश्यकता देखिएको छ । त्यस्ता केही व्यापारीहरू पक्राउ परेको हल्ला पनि सुनिन्छ । तर त्यस्ता व्यापारीहरू अझै लुकीछिपी यो धन्दामा लागेको हुनु पर्छ । अब सरकारले त्यस्ता व्यापारीहरूको खोजी गर्नु पर्छ ।
नेपालको संविधानमा हरेक नागरिक स्वस्थ भएर बाँच्न पाउनुपर्ने अधिकारको सुनिश्चित गरिएको छ । तर, बजारमा म्याद नाघेका अखाद्य वस्तुहरूको बिक्री वितरणले नागरिकको स्वस्थ भएर बाँच्न पाउने संवैधानिक हकमाथि नै प्रश्न चिन्ह खडा भएको छ । यो गम्भीर कुरा हो । अब खोजी खोजी सरकारले अखाद्य वस्तु नष्ट गर्नु पर्छ । यदि सरकारले अखाद्य वस्तु नष्ट गर्न सकेन भने धेरै उपभोक्ताको ज्यान अकालमा जान सक्ने खतरा उत्पन्न हुन सक्छ । त्यसैले, त्यस्तो अवस्था आउन नदिन अखाद्य वस्तुलाई नष्ट गर्नु पर्छ । यो सरकारको कर्तव्य हो ।
आम उपभोक्ताको स्वास्थ्यमाथि खेलवाड गर्ने अपराधीहरूलाई कुनै पनि बहानामा उन्मुक्ति दिनु हुँदैन । यतिबेला कोरोना भाइरसको सङ्क्रमण बढिरहेको अवस्था छ । हरेक व्यक्ति कोरोनासँग लडिरहेका छन् । सडेगलेका अखाद्य वस्तुको सेवनले क्यान्सर, मुटुरोग जस्ता घातक रोग समेत लाग्न सक्ने त्रास आम उपभोक्तामा बढेर गएको छ । सरकारी निकायले अखाद्य वस्तु बिक्रीवितरण गर्दै हिँड्ने कालो बजारीलाई अब कडा कारबाही गर्नु पर्छ । दशैंतिहार नजिकिंदै गर्दा कालो बजारीको बिगबिगी पनि बढदै गएको छ । बजार अनुगमनलाई सरकारले तीव्रता दिनुपर्ने आवश्यकता देखिएको छ । बजार अनुगमन मेला पर्वमा मात्र होईन , बारम्बार जारी राख्नु पर्छ । त्यसो भयो भने मात्र आम उपभोक्ता सुरक्षित हुन सक्छन् ।
