– रिना बस्नेत –
पत्रकार केएल पीडितको नयाँ चलचित्र ‘लावाजुनी’ ले युनिभर्सल प्रमाणपत्र पाएको छ । कमलरी विषयवस्तुमा निर्माण भएको चलचित्र ‘लावाजुनी’लाई चलचित्र जाँच समितिले युनिभर्सल प्रमाणपत्र दिएको हो । जाँच समितिले चलचित्र लावाजुनी सबै उमेर समूहका दर्शकहरुले हेर्न सक्ने जनाएको छ ।
‘लावाजुनी’ सञ्चारकर्मी केएल पीडितको लेखन तथा निर्देशन रहेको सामाजिक चलचित्र हो । यस चलचित्रमा कमलरी बस्दा थारु बालिकाहरुले भोग्नुपरेको शोषण, उत्पीडन र हिंसाको चित्रण गर्नुका साथै उनीहरुको मुक्ति, स्वतन्त्रता र शैक्षिक अधिकारलाई सशक्त ढङ्गले उठाइएको छ । पहल नेपालको ब्यानरमा निर्मित ‘लावाजुनी’ को कार्यकारी निर्माता गेहेन्द्र बस्नेत हुन् भने निर्मातामा रिना बस्नेत, सम्झना जीएम, टोपबहादुर जीसी र शारदा बीसी रहेका छन् ।
चलचित्रमा छविलाल कोपिला, ज्वाला खतिवडा, सुशीला चौधरी, वर्षा लम्साल, सुप्रिया देवकोटा, निश्मा वली लगायतका कलाकारहरुको अभियनय रहेको छ । सन्तोष श्रेष्ठको सङ्गीत रहेको यस चलचित्रमा कोमल वली, कुलानन्द गिरी, सतिश राजभण्डारी, स्वीकृति डाँगी, कोमलसरी घर्ती र याङ्शु श्रेष्ठले स्वर दिएका छन् ।
करीब ५० लाखमा निर्माण गरिएको चलचित्र ‘लावाजुनी’ लाई देश तथा विदेशमा च्यारिटी शो गरी हलहरुमा रिलिज गरिने कार्यकारी निर्देशक पीडितले जानकारी दिए । उनले च्यारिटी शोका लागि देशभित्र र बाहिर विशेष प्रदर्शन गर्ने तयारी भएको पनि जानकारी दिएका छन् । साथै प्रदर्शन गर्न इच्छुक सङ्घ, संस्था वा व्यक्तिहरुले चलचित्रका निर्माता गेहेन्द्र बस्नेत (९८४७८३४९४३) वा निर्देशक केएल पीडित (९८५७८३२०९८) लाई सम्पर्क गर्न समेत उनले आग्रह गरेका छन् ।
