गीतकार सङ्घ नेपालको १५ औं साधारणसभा एवम् ७औं अधिवेशनबाट गीतकार वसन्त वित्यासी थापाको नेतृत्वमा नयाँ कार्यसमिति चयन भएको छ । शनिबार सम्पन्न सङ्घको ७ औं अधिवेशनबाट गीतकार थापा दोस्रो कार्यकालका लागि पुन: अध्यक्षमा निर्विरोध निर्वाचित भएका हुन् ।
थापाको नेतृत्वमा चयन भएको सङ्घको नयाँ कार्यसमितिको उपाध्यक्षमा रमेश कोईराला, महासचिवमा टीका राई शिव, सचिवमा शितल कादम्बिनी र कोषाध्यक्षमा चेतन खतिवडा पुनः दोहोरिएका छन् । उनीहरु निर्विरोध निर्वाचित भएका हुन् ।
त्यस्तै कार्यसमिति सदस्य ६ जना आवश्यक रहेकोमा ८ जनाको उम्मेदवारी परेको थियो । जसमध्ये जीवन मुकारुङ, रमेश दाहाल, कमल पौडेल, गोविन्द श्रृङ्खला, देवी पराजुली र विष्णु भण्डारी निर्वाचित भएका छन् । कार्यक्रम प्रतिष्ठित गीतकार राजेन्द्र थापाको प्रमुख आतिथ्यमा सम्पन्न भएको थियो भने पूर्वमन्त्री वरिष्ठ गीतकार एस्पी कोइराला, नेपाल साङ्गीतिक सङ्घका महासचिव सुमन पण्डित, नारायणगोपाल स्मृति प्रतिष्ठानका अध्यक्ष दीपक केसी, सङ्घका पूर्व अध्यक्षहरु योगेन्द्रमणि दाहाल, चूडामणि देवकोटा, शुभ मुकारुङ लगायतका वरिष्ठ गीतकारहरुको उपस्थिति रहेको थियो ।
