गायक तथा सङ्गीतकार अनुप रेग्मीको नयाँ गीत ‘पञ्चेबाजा बजाउँदै’ को भिडिओ सार्वजनिक भएको छ । विगत २ दशकदेखि गायन तथा सङ्गीत कर्ममा सक्रीय रहँदै आएका गायक रेग्मीको यस गीतमा गीतकार तथा सङ्गीतकार येदिन गजमेरको शब्द तथा सङ्गीत सिर्जना रहेको छ । विबाहको माहोल सुरु भए लगत्तै बजारमा ल्याइएको यस गीतले दर्शक/श्रेताको मन छुने कुरामा आफू विश्वस्त रहेको गीतकार तथा सङ्गीतकार येदिन बताउँछन् ।
गीतमा पछिल्लो पुस्ताका चर्चित मोडलद्वय सुधिर श्रेष्ठ र करिश्मा ढकालको बेजोड अभिनय देख्न सकिन्छ । पञ्चे बाजाको यस भिडिओमा सुधिर र करिश्मा गज्जबसँग खुलेका छन् । भिडिओ हेर्दा लाग्छ कि सुधिर र करिश्मा साँच्चिकै बेहुला बेहुली हुन् भन्ने । काठमाडौँको कोकर्ण नगरपालिकाको उत्तरबाहिनी मन्दिरमा छायाङ्कन गरिएको यस भिडिओको निर्देशन पनि गायक रेग्मीले नै गरेका हुन् ।
पुष्कर सुनुवारको म्युजिक एरेञ्ज रहेको यस गीतमा केशवराज भट्टको कोरियोग्राफी रहेको छ । बुद्ध थापाको छायाङ्कन रहेको यस भिडियोको सम्पादन विकाश दाहालले गरेका हुन् । जुनी गजमेरले निर्माण गरेको यो भिडियो रिदिन इन्टरटेनमेन्ट मार्फत बजारमा ल्याइएको हो ।
