” रवि जस्तै ओली देउवा देशको मुहार फेर ” बोलको गीत सार्बजनिक

काठमाडौं । लोकप्रिय पत्रकार रवि लामिछानेको कामको प्रशंसा गर्दै ‘रवि जस्तै ओली देउवा देशको मुहार फेर’ बोलको गीत सार्वजनिक गरिएको छ । ‘सिधा कुरा जनतासँग’ का संचालक लामिछानेलाई काम गर्न हौसला दिँदै सुसेली म्युजिक प्रा.लि.को प्रस्तुतिमा गायक नवीन विरही श्रेष्ठ र गायिका देवी रुम्वाको आवजामा रहेको सन्देशमूलक सो गीतको भिडियो बजारमा आएको हो ।

जनताको न्यायको निमित्त बोल्ने भएका कारण उनी यो कार्यक्रम मार्फत जनताको प्रिय बनेका हुँदा उनको कामको प्रशंसा गर्दै गीत निर्माण गरिएको कुरा गीतका रचनाकार प्रेम थापाले बताए ।

कर्मचारीहरूबाट ठगिएका, पुलिस-सेनाबाट प्रताडित भएका, जनताबाट नै ठगिएका वा थिचो मिचोमा परेका, दलालबाट विदेशमा बेचिएर नारकीय जीवन बिताईरहेका र सरकारबाट कुनैपनि सुबिधा पाउनबाट बन्चित भएकाहरूको लागि खबरदारी गर्ने र न्याय दिलाउन महत्वपूर्ण भूमिका निर्वाह गर्ने कार्यक्रम बनेको छ सिधा कुरा जनतासँग । गीतमा कार्यक्रमका संचालक रवि लामिछानेलाई प्रोत्साहित गर्दै कामको कदर गरिएको छ ।

प्रेम थापाको शब्द तथा संगीत रहेको यस गीतमा पूर्ण संयोगको म्युजिक एरेन्ज रहेको छ । भिडियो महेश महराले खिचेका हुन् भने चेतन सागरले सम्पादन तथा नवीन विरही श्रेष्ठले निर्देशन गरेका छन् । गीतको भिडियोमा विकाश श्रेष्ठ र विनु लामाको अभिनय रहेको छ ।