सञ्चारकर्मी कल्पना भण्डारीको स्वर र चर्चित गीतकार बिपिन किरणको शब्द रहेको तीजको गीत सार्वजनिक भएको छ । ‘अहिलेको तीजैमा’ बोलको सो गीतमा भण्डारीको स्वर र अभिनय समेत रहेको छ । श्रीकृष्ण बम मल्लको संगीत रहेको गीत किरण क्रियसनले बजारमा ल्याएको हो । तीज भनेको विशेषगरी दिदी बहिनी भेला हुने, नाचगान र रमाइलो गर्ने पर्व भएकोले आफूले ल्याएको गीतले मनोरञ्जन दिनेमा विश्वस्त रहेको गायिका भण्डारी बताउछिन् । तीज पर्वमा रंगहरुको संयोजन, एक आपसबीचको रौनकता, मनमा छाउने उत्साह मलाई असाध्यै मनपर्ने पाटो हो, उनी भन्छिन् । रामकुमार केसीको छायांकन राज महर्जनको कोरीयोग्राफी रहेको उक्त गीतको भिडियोको सम्पादन तथा निर्देशन टेकेन्द्र साहले गरेका छन् ।
गायिका भण्डारी झण्डै डेढ दशकदेखि नेपाली टेलिभिजनमा सक्रिय छिन् । उनले यसअघि पनि बिपिन किरणको शब्दमा ‘मै कति भाग्यमानी’ बोलको तीजगीत बजारमा ल्याएकी थिइन् । आफूलाई संगीतको सामान्य तर प्रतिवद्ध विद्यार्थी ठान्ने भण्डारीले छिटै नै आधुनिक गीतको एल्बम ल्याउने तयारी गरेको बताइन् । भण्डारी पेशाले सञ्चारकर्मी भएपनि उनको स्वरमा बेग्लै मिठास भएको र त्यो कुरालाई अब आउने एल्बमले समेत प्रष्ट पार्ने गीतकार बिपिनले बताए ।
