आफ्नै गृहग्राम सप्तरी, भारदहबाट २०४८ सालमा एउटा सङ्गीत क्लव मार्फत् गायनमा प्रवेश गरेका उदय नारायण झा त्यसको एक वर्षपछि आफ्नो भाग्य परीक्षा गर्न राजधानी काठमाडौँ आए । त्यहीवर्ष धीरेन्द्र प्रेमर्षीको एउटा मैथिली गीत रेकर्ड गरेपछि उनी औपचारिक रूपमा साङ्गीतिक दुनियाँमा प्रवेश गरे । उनले त्यहीवर्ष विजयसिंह मुनालको सङ्गीतमा एउटा नेपाली आधुनिक गीतपनि रेकर्ड गरेर यस क्षेत्रमा सङ्घर्ष गरिरहे । तर उनको भाग्य बलियो रहेछ, धेरै लामो सङ्घर्ष गर्नु परेन । भारतमा गएर सङ्गीत प्रशिक्षण लिने ध्येयले छात्रवृत्तिका लागि भारतीय दूतावासमा फारम भरेका थिए, उनी उत्तीर्ण भए । अनि उनी मुम्बईस्थित गन्धर्व महाविद्यालयमा भर्ना भए l स्नातक सम्मको शिक्षा हासिल गरे र रीतुराजको सङ्गीतमा हिन्दी टेलिसिरियलमा गीत गाउन थाले । उनले रीतुराजकै सङ्गीतमा ‘प्यार भरा दिल तेरे लिये’ नामक हिन्दी फिल्ममै पनि गीत गाउने अवसर पाए । त्यसपछि उदय नारायणका लागि अवसरका ढोकाहरू खुल्दै जान थाले । त्यसैले त उनी आजसम्म करिव अढाई हजार गीत गाएको दाबी गर्न सक्ने लोकप्रिय गायक हुन पुगेका छन् । उनले हिन्दी बाहेक भोजपुरी, मैथिली, बङ्गाली, उडिया, राजस्थानी, गुजराती आदि भारतीय प्रादेशिक भाषामा भटाभट गीत गाइरहेका छन् ।
यी प्रतिभाशाली गायकका नयाँ नेपाली गीतहरू पहिलोपटक हालै म्युजिक नेपालले प्रकाशन गरेको छ । युट्युब र एमएन एपबाट प्रसारित उनका चारवटा गीतले छोटो समयमै श्रोतालाई आकर्षित गराइरहेका छन् ।
