‘नेपाल मण्डल पर्यटन नगरी’ नामक संस्थाले ‘नेपाल मण्डल चित्रकला प्रदर्शनी एवं राष्ट्रिय व्यक्तित्व सम्मान कार्यक्रम’ को आयोजना गरी लोकप्रिय सङ्गीतकार एवं सङ्गीत संयोजक बि. बि. अनुरागीलाई सम्मान गरेको छ l काठमाण्डौको बबरमहलस्थित ‘नेपाल कला परिषद’ मा आयोजित समारोहमा कार्यक्रमका प्रमुख अतिथि पुष्पकमल दाहाल ‘प्रचण्ड’ को हातबाट सङ्गीतकार अनुरागीले सम्मान ग्रहण गरेका हुन् l समारोहमा कला, साहित्य, संस्कृति र समाजसेवाको क्षेत्रमा उल्लेख्य योगदान गर्ने व्यक्तिहरुलाई सम्मान गरिएको थियो l जस अनुसार सत्यमोहन जोशी, भैरव रिसाल, शान्ता श्रेष्ठ, बि. बि. अनुरागी र नवल खड्का सम्मानित भएका हुन् l
कृष्ण के.सी.को अध्यक्षतामा एकबर्ष अघि स्थापित यस संस्थाले नेपालको पर्यटन प्रवर्धन, विकाश तथा कला-साहित्यको संरक्षण र उत्थानका लागि काम गर्दै आईरहेको थाहा भएको छ l संस्थाले यस प्रकारको सम्मान कार्यक्रमको पहिलोपटक आयोजना गरेको हो भने सम्मान कार्यक्रमसँगै नेपाल एकीकरण सम्बन्धी चित्रकला प्रदर्शनीको समेत उद्घाटन गरिएको थियो l प्रदर्शनी भने ७ दिनसम्म चल्ने थाहा भएको छ l
