ईटहरी/ नेपाली पप गायन विधामा आफ्नो छुट्टै शैलीका कारण युवापुस्ता माझ चर्चित बनेका उदियमान पप गायक हुन् नितेश जङ्ग कुँवर । ईटहरीको कुण्डलिनी लाइभ म्युजिक बारमा सयौं दर्शकको माझमा नितेशले आफ्नो प्रस्तुति दिएका छन् । ‘कुण्डलिनी लाइभ म्युजिक बार’ले एक कार्यक्रमको आयोजना गर्दै प्रस्तुतिको लागि नितेशलाई ल्याएको थियो ।
गायक कुँवरका प्राय: सबैजसो गीत युवा पुस्तामा लोकप्रिय छन् । पछिल्लो समय सार्वजनिक भएको ‘निष्ठूरी मोरीले’ बोलको गीत चर्चामा आएपछि उनीप्रतिको युवा क्रेज झन् बढ्दो पाइन्छ । छोटो समयमा लोकप्रिय भएका नितेशका ईटहरी र आसपासमा फ्यानहरुलाई लक्षित गरी सो कार्यक्रमको आयोजना गरिएको थाहा भएको छ ।
साँझ ५ बजेबाट सुरु भएको सो कार्यक्रम लगभग रातको १० बजेसम्म चलेको थियो भने स्थानीय स्तब्ध ब्यान्डको पनि प्रस्तुति रहेको थियो । सो लाइभ कार्यक्रममा ५०० र १००० रुपैयाका टिकट विक्री गरिएको थियो । कतिपय टिकट नपाएर त्यसै फर्केका थिए । जुश र वियरको चुस्की लिँदै नितेशको प्रस्तुतिमा उपस्थित युवायुवतीहरु नाचेका थिए । कार्यक्रम रातको समयमा आयोजना गरिएको भएपनि पारिवारिक वातावरणमा सम्पन्न भएको थियो ।
