त्रिकोणात्मक प्रेमकथानक फिल्म ‘रेनी’ को ट्रेलर र ‘मलाई नाइँ नाइँ’ बोलको गीत सार्वजनिक गरिएको छ । भदौ ८ गतेदेखि प्रदर्शनमा आउने सो फिल्मको आईतबार राजधानीमा प्रेसमिट गरी गीत र ट्रेलर देखाइएको हो । विमला मल्ल र संजीव मल्लले निर्माण गरेको फिल्मको सो गीतमा नवअभिनेत्री सनम मल्ल र अभिनेता दीपक ढकाललाई रोमान्टिक मुडमा प्रस्तुत गरिएको छ ।
पुष्कर सुनुवारको स्वर र संगीत रहेको उक्त गीतको कोरियोग्राफी मदन खड्काले गरेका हुन् । गिरिश रिजालको निर्देशनमा बनेको फिल्ममा सरोज खनाल, सनम मल्ल, दीपक ढकाल, सुरवीर पण्डित, रमेश लम्साल, बबिता लम्साल, टंक डुम्रे, गुरु भुटिया, बिजय तिखातारी लगायतका कलाकारले अभिनय गरेका छन् ।
निर्मात्री विमलाले निकै मेहेनतका साथ राम्रो फिल्म बनाएकाले सफल हुनेमा आफूहरु विश्वस्त रहेको बताइन् । उनले आफूहरु फिल्म क्षेत्रमा नयाँ भएता पनि फिल्म चाहिं परिपक्क बनेको उल्लेख गरिन् ।
फिल्मकी स्क्रिप्ट राईटर र गीतकार समेत रहेकी नवअभिनेत्री सनमले ‘रेनी’ मा मायाप्रेम, हाँसो, रोदन, द्वन्द्वका साथमा सामाजिक विषयलाई प्रस्तुत गरिएको जानकारी दिइन् । उनले आफू नयाँ भएकाले सबैको माया र साथले नै अघि बढ्न हौसला मिल्ने बताइन् । अभिनेता दीपकले ‘रेनी’ को स्क्रिप्ट निकै मन परेको बताउँदै आम दर्शकले फिल्म सफल गराइदिने विश्वास ब्यस्त गरे । निर्देशक गिरिशले ‘रेनी’ आफ्ना लागि विशेष भएको बताउँदै दर्शकले पनि मन पराउने दावी गरे । त्यसैगरी कार्यक्रममा कमेडियन टंक डुम्रे र बिजय तिखातारीले पनि आफ्नो भूमिकाबारे प्रष्ट्याएका थिए ।
शाही मल्ल फिल्मस्को ब्यानरमा निर्मित यस फिल्मलाई गोविन्द शाहीले वितरण गर्दैछन् । जयराम रिजालले खिचेको फिल्मका गीतमा विनोद खम्बूको पनि संगीत छ । फिल्मको द्वन्द्व निर्देशन राजु किराँतीले गरेका हुन् ।
