काठमाडौं, ९ साउन ।
नयाँ फिल्म ‘रेनी’ भदौ ८ गतेदेखि प्रदर्शन हुने भएको छ । त्रिकोणात्मक प्रेमकथामा आधारित यस फिल्मको प्रदर्शन मितिसँगै फस्टलुक पोष्टर पनि सार्वजनिक गरिएको हो । विमला मल्ल र संजिव मल्लले निर्माण गरेको यस फिल्ममा सरोज खनाल, सुरवीर पण्डित (दारी बा), दीपक ढकाल, गिरिश रिजाल (समीप) का साथमा नवनायिका सनम मल्ल प्रमुख भूमिकामा रहेका छन् । गिरिश रिजाल (समीप) को निर्देशनमा बनेको ‘रेनी’ को स्क्रिप्ट नवनायिका सनमले लेखेकी हुन् ।
काठमाडौ उपत्यका तथा कुलेखानीमा खिचिएको यो फिल्म एक्शन, लभ र कमेडीका साथै सामाजिक सन्देशयुक्त भएको कुरा निर्मात्री विमला बताउँछिन् । जयराम थापाले खिचेको यस फिल्मका गीतमा बिनोद खम्बू र पुस्कर सुनुवारको संगीत रहेको छ भने गीत सनम मल्ल र गुरु भुटियाले लेखेका छन् । राजु किराँतको द्वन्द्व र अनिश लामाको कोरियोग्राफी रहेको यस फिल्मलाई गोविन्द शाहीले वितरण गर्ने निश्चित भएको छ ।
