भर्खरै पाँचतारे होटल अन्नपूर्णमा ‘नेपाल म्युजिक अवार्ड’ सम्पन्न गरेको चाहना मिडिया प्रा. लि. ले निकट भविष्यमा ‘नेपाल लोक स्टार’ नामक बृहत् ‘रियालिटी शो’ को आयोजना गर्ने भएको छ l लोक गायनलाई लक्षित गरी आयोजना गर्न लागिएको यस कार्यक्रममा नेपालमा भएका सबै भाषा र संस्कृतिका लोक गायक-गायिकाहरुले प्रतिस्पर्धामा भाग लिन पाउने कुरा चाहना मिडियाका अध्यक्ष सहदेव कोईरालाले जानकारी गराएका छन् l उनका अनुसार आगामी तीजको लगत्तै अडिशनको लागि फारम खुला गरिने छ l फारम रु. १ हजार शुल्क तिरेर अनलाइन मार्फत या ७७ वटै जिल्लामा स्थापना गरिने अस्थाई कार्यालय मार्फत भर्न सकिने छ l जिल्ला अडिशनमा स्थानीय विज्ञहरुलाई निर्णायक बनाइने छ भने त्यसपछिको प्रदेश अडिशनमा केन्द्रका जजहरुको समेत सहभागिता रहने छ l जिल्लाबाट १०-१० जनाको दरले र त्यसपछि प्रदेशबाट पनि १०-१० जनाको दरले सर्वोत्कृष्ट प्रतिस्पर्धीहरुको छनोट गरी ७० जनालाई केन्द्रमा ल्याईने छ l
लगभग १२ देखि १५ करोड सम्मको खर्च अनुमान गरिएको यस प्रतिस्पर्धाका प्रथम, द्वितीय र तृतीय विजेताले जिन्सी उपहारहरुको साथमा क्रमशः नगद रु. ५० लाख, रु.२५ लाख र रु. १० लाख प्राप्त गर्ने कुरा समेत सहदेव कोईरालाले जानकारी गराएका छन् l
