नेपाली नारीहरुको महान पर्व हरितालिका तिज नजिकिंदै गर्दा तिज गीतका भिडिओहरु पनि नियमित रुपमा सार्वजनिक भईरहेका छन् l कतिपय तिज गीत द्विअर्थी, अमर्यादित र छाडा भएको, त्यस्ता गीतले विकृति फैलाएको र समाजलाई अश्लिलतातर्फ धकेलिरहेको भन्ने आवाज संस्थागत एवं व्यक्तिगत रुपमा समेत उठिरहेको बेला विशुद्ध मनोरञ्जनात्मक, पारिवारिक एवं सामाजिक तिज गीत ‘भाँडा बजाउने’ को भिडिओ बजारमा आएको छ l
लोकप्रिय सङ्गीतकार/गायक नरहरि प्रेमी र पछिल्लो समयकी चर्चित गायिका दिपिका बयम्बूको स्वर रहेको यो गीत पुष्पा पौडेलले रचना गरेकी हुन् l सङ्गीत उदियमान सङ्गीतकार अनिल श्रेष्ठको र सङ्गीत संयोजन तथा मिक्सिङ/माष्टरिङ कृष्ण बाजुरालीको रहेको छ l गीतको रेकर्डिङ कार्य ‘म्युजिक एरा’ स्टुडिओमा भएको हो l
बहुआयामिक छवि बनाएका सङ्गीतकार/गायक नरहरि प्रेमीले गायनका साथै अभिनय पनि आफैंले गर्न भ्याएका छन् यस गीतको भिडिओमा l जसमा उनलाई गीतकार पुष्पा पौडेलले नायिकाको रुपमा साथ दिएकी छिन् l हास्य रसको मिठासले भरिपूर्ण यो म्युजिक भिडिओ निकै मनोरञ्जक पनि छ l हेर्दाहेर्दै भिडिओ कतिबेला सकियो पत्तै हुन्न l नरहरि प्रेमीको अभिनय दक्षतासंग धेरैजसो दर्शक परिचित नै छन् l तथापि यो ‘भाँडा बजाउने’ गीतको भिडिओ हेरिरहँदा नरहरि कुनै चलचित्रमा हास्य पात्रको रुपमा अभिनय गरिरहेको जस्तो लाग्छ l त्यसो त पुष्पा पौडेलको अभिनय पनि कम छैन l नायक-नायिका दुबैको सशक्त र सन्तुलित अभिनयले गर्दा भिडिओ हेरिरहँदा समाजको यथार्थ चित्र हेरिरहेको महसुस हुन्छ l यी सबै कुरालाई यथार्थपरक बनाउन र जीवन्त तुल्याउन म्युजिक भिडिओका निर्देशक राजकुमारको निर्देशकीय भूमिकाको विशेष र अहम् महत्व रहेको कुरा सहजै अड्कल काट्न सकिन्छ l निर्देशन संगसंगै सम्पादनमा पनि खरो उत्रिएका छन् राजकुमार l
तिज आउन अझै केही समय बाँकी भएता पनि यो ‘भाँडा बजाउने’ गीत सुन्दा/हेर्दा तिज हाम्रो घर दैलोमै आईपुगेको हो कि जस्तै छनक पाइन्छ l भिडिओ सुन्दर देखिनुमा क्यामेरा पर्सन खेम थापाको र मेकअप आर्टिष्ट बिमला सापकोटाको कला कौशलको महत्वलाई पनि नजरअन्दाज गर्न मिल्दैन l भिडिओ श्रुति सङ्गीत विद्यालयको प्रस्तुतिमा आएको हो l
