-तुलसी गिरी ‘भावुक’
गीतकार सङ्घ नेपालको आयोजनामा देवी पराजुलीद्वारा रचित दुई गीत ‘गुञ्जियोस् शान्ति धुन’ र ‘आँखाले नि मनले जस्तै’ को भिडिओ लोकार्पण गरिएको छ l सङ्घका अध्यक्ष वसन्त बित्यासी थापाको अध्यक्षत़ा साथै उपप्रधान एवं शहरी विकाश मन्त्री प्रकाशमान सिंहको प्रमुख आतिथ्यतामा बिहीबार सम्पन्न कार्यक्रममा दुई गीतका भिडिओ एकैसाथ लोकार्पण गरिएको हो l कार्यक्रम शहरी विकाश तथा भवन निर्माण विभागको सभा हल बबरमहलमा आयोजना भएको थियो l
प्रेम, शान्ति, खुशी र सबैप्रति समभावको कामना गरिएको अत्यन्तै सकारात्मक चिन्तनले ओतप्रोत गीत ‘गुञ्जियोस् शान्ति धुन’ मा सुप्रसिद्ध सङ्गीतकार अर्जुन नेपालीको सङ्गीत तथा सङ्गीत संयोजन, विक्रम कार्कीको रेकर्डिङ/मिक्सिङ रहेको छ भने सृष्टि नेपालीले स्वर दिएकी छिन् l भिडिओ नितेश लामाको सिनेमाटोग्राफी र सम्पादनमा निर्माण भएको हो l
यसैगरि प्रेमिल परिकल्पना र रोमान्टिक भाव भएको अर्को गीत ‘आँखाले नि मनले जस्तै’ मा भैरव खकुरेलको सङ्गीत र प्रविन दत्तको सङ्गीत संयोजन रहेको छ भने लोकप्रिय गायक लाक्पा शेर्पाले स्वर दिएका छन् l गायक लाक्पा स्वयंले अभिनय गरेको यस भिडिओमा पेमा जङ्मु शेर्पा र गीतकार देवीलाई पनि देख्न सकिन्छ l
भिडिओ लोकार्पण समारोहमा पूर्व मन्त्री एवं वरिष्ठ गीतकार एस्पी कोईराला, राष्ट्रिय सभा सदस्य सुमित्रा बीसी, मधेसी आयोग सदस्य रेणु देवी साह, समावेसी आयोगका पूर्व अध्यक्ष विष्णु ओझा, सहसचिव नारायण मैनाली, नारायण गोपाल स्मृति प्रतिण्ठानका अध्यक्ष दीपक के.सी.,पीडी झप्पर सिंह बिश्वकर्मा, सञ्चारकर्मी, लगायत गीत-सङ्गीत क्षेत्रका विशिष्ट व्यक्तिहरुको उल्लेख्य उपस्थिति रहेको थियो l कार्यक्रम गीतकार सङ्घका उपाध्यक्ष रमेश कोइरालाले सञ्चालन गरेका थिए l
