फरक भाव, भिन्न चिन्तन र गम्भीर कथा बोकेको गीत ‘म हारेको छैन यो जिन्दगीसँग’

-तुलसी गिरी ‘भावुक’

सुप्रसिद्ध निर्देशक कृष्णदेव रुपाखेतीको निर्देशनमा केही फरक भाव, भिन्न चिन्तन र गम्भीर कथा बोकेको गीत ‘म हारेको छैन यो जिन्दगीसँग’ को  भिडिओ बजारमा आएको छ l गीतकार सरला श्रेष्ठको रचना, नरेन्द्र प्यासीको सङ्गीत, विनोद कुमार भुजेलको सङ्गीत संयोजन र करन परियारको स्वर रहेको यस गीतको मिक्सिङ/माष्टरिङ प्रकाश खरेलले गरेका हुन् l

भिडिओमा सुरेश कोहली, मिशेल घिमिरे र बाल कलाकार प्रवेश पौडेलको अभिनय रहेको छ l उत्सव दाहालले सिनेमाटोग्राफी र मिन रावलले सम्पादन गरेको यो भिडिओ राजधानीको मुख्य व्यापारिक केन्द्र असन-इन्द्रचोक र आसपासका क्षेत्रमा छायाङ्कन गरिएको थाहा भएको छ l

भिडिओमा समृद्ध आर्थिक स्थितिबाट परिस्थितिवश भारी बोकेर गुजारा गर्नुपर्ने अवस्थामा पुगेको एक युवाको सङ्घर्षपूर्ण कथा र आशावादी मानसिकतालाई मर्मस्पर्शी ढङ्गमा प्रस्तुत गरिएको छ l कथाको मुख्य पात्रको आर्थिक अवस्था कसरी डामाडोल भयो भन्ने कुरा भिडिओमा स्पष्ट नभए पनि अन्त्यमा To Be Continue राखिएको हुँदा यसको अर्को भाग पनि आउने र त्यसमा बाँकी कुरा स्पष्ट हुने अपेक्षा गर्न सकिन्छ l