गीतकार सङ्घ नेपालले ‘ध्यानाकर्षण तथा अपिल’ शीर्षकमा एक विज्ञप्ति प्रकाशित गरि गीत-सङ्गीत क्षेत्रका सर्जक-कलाकारहरुलाई जिम्मेवार र मर्यादित हुन आग्रह गरेको छ । सङ्घका अध्यक्ष वसन्त बित्यासी थापाद्वारा हस्ताक्षरित सो विज्ञप्तिमा भनिएको छ- ‘नेपाल आफ्नै मौलिक कला, साहित्य र संस्कृतिको विशेषता बोकेको देश हो । हाम्रो आफ्नै मौलिक परम्परा तथा विविधता छन् । परम्परा, संस्कृति र विविधता नै देशको पहिचान हुन् । त्यसैले कुनै पनि देशको पहिचान मेटाउन सांस्कृतिक अतिक्रमण हुने गर्दछ । भाषा र संस्कृति माथि अतिक्रमण हुँदै जाँदा एक समय यस्तो आउँछ कि देशको आफ्नो मौलिकपन केही रहँदैन र अन्तमा देशको पहिचान नै गुम्न जान्छ ।
नेपाली जनजनको भावना, दुःख–सुख, सङ्घर्ष र प्रेमलाई कलात्मक ढङ्गले अभिव्यक्त गर्ने गीतहरूले नेपाली समाजको वैभव र विकासमा महत्वपूर्ण योगदान पुर्याउँदै आएको कुरा सबैमा विदितै छ । तर पछिल्लो समयमा गीत सङ्गीतको विकृति, विसङ्गतिप्रति गीतकार सङ्घ नेपालको गम्भीर ध्यानाकर्षण भएको कुरा जानकारी गराउँदछौं ।
हामी सबैलाई अवगत भएकै कुरा हो गीतले समाज रुपान्तरणमा तीब्र प्रभाव पार्दछ । समाजका जुनसुकै वर्गका स्रोताले गीत सुन्ने, गुनगुनाउने र आफ्नो तरिकाले गीतलाई आत्मसात गर्ने गर्दछन् । तर पछिल्लो समयमा नेपाली साङ्गीतिक क्षेत्रमा गीत सङ्गीत मार्फत भए गरेको सांस्कृतिक विचलन, दुषित प्रभाव, गैरजिम्मेवार लेखन तथा सम्पादनका कारण श्रव्य दृश्यको रुपमा नेपाली सामाजिक मर्यादामाथि नै खलल पुर्याउने कार्य भएको हुनाले यस प्रकारको विकृतिजन्य कार्यलाई पहिले आफैं मूल्याङ्कन (सेल्फ सेन्सरसिप) गरि सच्चिन तथा यसलाई नियमन गरि स्वस्थ गीत सङ्गीतको विकासको लागि सम्बन्धित निकायमा ध्यानाकर्षण गर्न गीतकार सङ्घ नेपाल हार्दिक अपिल गर्दछ । साथै गीतको जननी गीतकार नै भएको हुनाले यसप्रति अनुशासित रही सचेत भई जिम्मेवार र मर्यादित ढङ्गले समाजमा गीत पस्की समाजको शान्ति तथा मनोरन्जनलाई स्थापित गरिदिनुहुन सम्पूर्ण गीतकारज्यूहरुमा समेत हार्दिक अनुरोध गर्दछौं ।’
