‘वाह! यस्तो पो मुक्तक !’ शीर्षकमा दियालो साहित्य सरगमले नेपालमै पहिलो ऐतिहासिक मुक्तक गायन कार्यक्रम सम्पन्न गरेको छ । कार्यक्रमको मुख्य आकर्षण विश्वकीर्तिमानी सङ्गीतकार सन्तोष श्रेष्ठको एकल सङ्गीत र स्वरमा ऐतिहासिक मुक्तक गायन सम्पन्न भएको छ । सन्तोष श्रेष्ठले मुक्तककारत्रय शान्ति शर्मा, शिवराम खड्का र गणेशप्रसाद खतिवडाका ३/३ वटा मुक्तक गाएका थिए ।
नेपाली गजल गायनको स्वर्ण दशक अभियानमा गजलकार घनेन्द्र ओझा र सङ्गीतकार सन्तोष श्रेष्ठ जुटिरहेका बेला नेपालमै पहिलो मुक्तक गायन कार्यक्रम भएको हुँदा उनले यस कार्यक्रमका लागि अलि बढी नै मेहनत गरेको बताएका छन्। उनले मुक्तक गाइरहँदा दर्शक / श्रोताको अनुहार मुक्तकको रस अनुसार नै फेरिएको प्रष्टै देखिन्थ्यो । वाह ! वाह ! को स्वर गुञ्जिरहेको थियो । शान्ति शर्माका मुक्तक मेरो देश रोयो, समाऊ दह्रो प्रेमका, ठुलै ठाउँ पर्छन्, शिवराम खड्काका मुक्तक उता मूल फुट्दा, पत्थर रहेछ त्यो मन, यता आफ्नो समस्याले र गणेशप्रसाद खतिवडाका मुक्तक नरोऊ पियारी, कुन हो क-कसको, मलाई छैन है फुर्सद गाइएका थिए ।
वाद्यवादकद्वय रमेश डङ्गोलले तबला र डम्बर खड्काथोकीले बाँसुरीमा साथ दिएका थिए । कार्यक्रममा रत्नविरही घिमिरे, सविता बराल, सृजना सरोवर र राधा कणेलले आफ्ना ५ / ५ वटा मुक्तक वाचन गरेका थिए । सहप्राध्यापक कोषराज न्यौपानेले आफ्नै मुक्तक वाचन गरेर कार्यक्रम समुद्घाटन गरेका थिए । प्रमुख अतिथि प्राध्यापक डाक्टर देवी नेपालले दियालोले स्थापनाकालदेखि वर्तमानसम्म पनि नेपाली साहित्यका विभिन्न विधामा केही न केही नयाँ काम गर्दै आएको बताए । ‘आज दियालोले नेपालको इतिहासमा नै पहिलोपटक मुक्तकलाई गायनमा प्रस्तुत गरेर नयाँ इतिहासको थालनी गरेको छ र सन्तोष श्रेष्ठले नेपालमै पहिलो ऐतिहासिक मुक्तक गायन सम्पन्न गरेर इतिहास कायम गरे । यस्तो ऐतिहासिक कार्यक्रममा साक्षी बस्ने अवसर प्रदान गरेकामा संस्थाप्रति हार्दिक कृतज्ञता व्यक्त गर्दछु’ प्राध्यापक नेपालले भने ।
दियालो साहित्य सरगमका कोषाध्यक्ष प्रकाश बस्नेतले स्वागत मन्तव्य व्यक्त गरेका थिए। गायन, वाद्यवादन र वाचनमा सहभागीहरूलाई सम्ममान गरिएको थियो । दियालो साहित्य सरगमका अध्यक्ष शान्ति शर्माको अध्यक्ष्यतामा सम्पन्न सो कार्यक्रमको सहजीकरण सचिव गणेशप्रसाद खतिवडाले गरेका थिए ।
