-तुलसी गिरी ‘भावुक’
लक्ष्मी महर्जन र ज्यापू सुनिल (शुक्रराज महर्जन) को संयुक्त प्रयासमा तयार भएको नेपाल भाषाको गीति एल्बम ‘दाइचा मैंचा’ (दाइ र बैनी) हालै सार्वजनिक भएको छ l एल्बममा मैंचा छला बाँलाका (बैनी कति राम्री भई), म्हिग:सुथय् छिमिथाय (हिजो बिहानै तिम्रोमा), यो मां यो बा जित: (आमा बुबा मेरो विहे गरिदेऊ), हायकेमते जित: दाइचा (मलाई नजिस्क्याउनू दाइ), मैंचा छ गन वना (बैनी तिमी कता जान लागेकी) र आला जि ल्यासे जुल (अब त म जवान भएँ) गरि फरक फरक भाव र स्वादका ६ वटा गीत समावेश गरिएको छ l जसमध्ये ४ वटा गीत ज्यापू सुनिल र लक्ष्मी महर्जनको युगल स्वरमा रहेका छन् भने बाँकी २ गीत सुनिल र लक्ष्मीका एकल स्वरमा छन् l सबै गीत ज्यापू सुनिलले रचना गरेका हुन् भने जुगल डङ्गोल, अनिल तुलाधर, लक्ष्मी महर्जन र ज्यापू सुनिलको सङ्गीत रहेको छ l
गायिका लक्ष्मी महर्जनको जन्म पिता बाबुकाजी महर्जन र माता रत्नमाया महर्जनको परिवारमा साइँली छोरीको रुपमा सीतापईलामा भएको हो l गीत गाउन मन लागे पनि लजालु स्वभावको कारण स्कुले उमेरमा उनले सबैको अगाडि त्यति गीत गाइनन् l बुबा बाबुकाजी हार्मोनी बजाएर नेपाल भाषाका गीत र भजन गाउनुहुन्थ्यो l घरमै साङ्गीतिक माहोल थियो तर पनि उनी बुबासँग डराउँथिन् l बिस्तारै खुल्दै गइन् l उनको प्रतिभा देखेर बुबा पनि खुशी हुनुभयो र हार्मोनी पनि बजाऊ भन्नुभयो l पछि बुबाले ‘तिमीलाई यो हार्मोनी उपहार नै भयो भनेर दिनुभयो l समयको अन्तरालसँगै लक्ष्मी मजाले हार्मोनी बजाएर टोल छिमेकतिर कार्यक्रम हुँदा गाउँन थालिन् l ‘म धेरैजसो भजन गाउँथें’ उनी भन्छिन् l
सारेगम कला केन्द्र बालाजूमा गुरु अशोक पौडेलसँग सङ्गीतको प्रारम्भिक शिक्षा लिएकी लक्ष्मीले दार्जेलिङका अर्का गुरु कैलास राईसँग क्लासिकल सङ्गीतको थप शिक्षा लिएकी थिईन् l लक्ष्मी लगायतका केही उत्साही साथीहरु मिलेर खोलेको सारेगम कला केन्द्र अहिले पनि चलिरहेको छ l तर व्यस्ततका कारण लक्ष्मी भने अहिले त्यहाँ संलग्न छैनन् l
लक्ष्मीले पहिलोपटक २०७४ सालमा आफ्नै शव्द/सङ्गीतमा नेपाल भाषाको युगल गीत ‘छ जुल अमेरिका’ रेकर्ड गरेकी थिईन् l जसमा उनलाई पुरुष स्वरमा राजेन्द्र शाक्यले साथ दिएका थिए l भिडिओ सहित बजारमा आएको यो गीतले उनलाई आफ्नो समुदायमा राम्रै पहिचान दियो l ‘नेपाली भाषाको गीत जस्तो चाहिँ नहुँदो रहेछ’ भाषाको कारण आफ्नो गीतले व्यापकता नपाएको अनुभव उनले सुनाईन् l हालसम्म १० वटा गीत रेकर्ड गरिसकेकी लक्ष्मीले एउटा नेपाली भाषाको गीत पनि गाएकी छिन् l कुनै समयकी चर्चित म्युजिक भिडिओ मोडल रमिता महर्जन लक्ष्मीकी जेठी छोरी हुन्, जो अहिले अष्ट्रेलियामा छिन् l ‘अब नेपाली भाषाको गीत पनि गर्ने ईच्छा छ’ लक्ष्मीले भविष्यको योजनाबारे बताइन् l
यसैगरि एल्बमका गीतकार ज्यापू सुनिलको जन्म पिता अस्तलाल महर्जन र माता कान्छी महर्जनको परिवारमा ललितपुरको खापिन्छेंमा भएको हो l २०४० सालदेखि नै गीत-सङ्गीतमा सक्रिय भएर लागे पनि व्यस्तताका कारण २०४७ सालदेखि भने उनी सङ्गीतबाट टाढा थिए l घर निर्माण कार्यमै व्यस्त रहेका सुनिल निर्माण कार्यबाट विश्राम लिएर ३५ वर्षपछि पुन: सङ्गीतकर्ममा फर्किएका छन् l आफ्नै बुबा अस्तलाल र काका चिरिकाजीबाट पारम्परिक वाद्यवादन र गायनको प्रेरणा प्राप्त गरेका सुनिलले मोहन बाराही गुरुसंग हार्मोनी सिकेका हुन् l लोकगायक रत्न बेहोसीलाई उनी मानार्थ गुरु मान्छन् l आफूलाई सङ्गीत क्षेत्रमा पुन: आउनका लागि उत्साहित बनाउने लक्ष्मी महर्जन, सुरज व्यञ्जनकार, जुगल डंगोल, ज्ञानमाला भजन, स्वयम्भूप्रति उनले आभार प्रकट गरेका छन् l
