चलचित्र ‘ढुङ्गेयुग’ मार्फत नेपाली संवाद विहीन तथा मूक चलचित्रको इतिहासमा आफ्नो नाम लेखाइसकेका निर्देशक माधवराज खरेलले आफ्नो पछिल्लो गीत ‘दूरदेखि आएँ प्रिय’ मार्फत समाजका संवेदनशील पक्षमा चोटिलो प्रहार गरेका छन् । हालैसालै सार्वजनिक भएको यस गीतमा खरेलले गीतकारका रूपमा आफूलाई प्रस्तुत गरेका छन्, जसले आधुनिक शहरको विसङ्गति, सम्बन्धको संकुचन र आत्म-विरोधाभासको भावलाई गहिरो चित्रण गरका छन् । खरेलले लेखेका गीतका शब्दहरू भावनात्मक मात्र होइनन्, सामाजिक चेतनाले पनि भरिएका छन् ।
‘दूरदेखि आएँ प्रिय, तिमी बस्ने शहरमा,
आत्माहरु बिक्दा रैछन्, सफल हुने रहरमा’
प्रस्तुत हरफहरू मार्फत निर्देशक खरेलले आजको दुनियाँको उपभोक्तावादी समाजमा रहेका मानिसहरु विशेषतः माया प्रेमले परिपूर्ण आत्मा कसरी व्यापारको वस्तु बन्न पुगेको छ भन्ने सन्देश दिएका छन् । उनको लेखनशैलीमा गहिरो भाव र प्रतीकात्मक बिम्ब रहेको छ, जसले दर्शक तथा श्रोताहरुको अन्तरमन छुने कुरामा निर्देशक तथा गीतकार खरेल विश्वस्त रहेका छन् ।
गीतमा स्वर दिएका छन् गायक डेभिड शंकरले । डेभिड शंकर पछिल्लो पुस्ताका लोकप्रिय गायक हुन् । थुप्रै दर्शक तथा श्रोताहरुको मनमुटुमा बस्न सफल गायक डेभिडले शब्दको मर्मलाई आत्मीय गायनमार्फत जीवन्त पार्ने कोसिस गरेका छन् । यस गीतको सङ्गीत पक्षपनि अत्यन्तै उत्कृष्ट रहेको छ । सङ्गीत र सङ्गीत संयोजन राजेन्द्र बजगाईको रहेको छ, जसले सरल तर प्रभावशाली धुन सिर्जना गरेका छन् l सङ्गीतको मिठासपूर्ण धुनले गीतलाई भावनाको लहरसँगै बाँधेर लैजान्छ । गीतको रेकर्डिङ, ध्वनि मिश्रण तथा सम्पादन मनोज परियारले गरेका हुन् ।
गीतको भिडिओ पक्ष पनि उत्कृष्ट रहेको छ । गायक स्वयम्ले नै भिडिओमा अभिनय गरेका छन् भने निर्देशनमा रहेकी छिन् पूजा ठकुरी l जसले निर्देशक खरेलको शब्दलाई दृश्यमा जीवन्तता दिएर गीतको सन्देशलाई अझ प्रभावशाली बनाएकी छन् । ठकुरी पछिल्लो पुस्तामा क्रियाशील म्यूजिक भिडिओ निर्देशकको रुपमा चिनिन्छिन् । भिडिओको छायाङ्कन युदिन योञ्जनले, सम्पादन तथा कलर संयोजन बिनोद बमले गरेका छन् । बम नेपाली म्युजिक भिडिओ क्षेत्रमा सक्रिय र ख्यातिप्राप्त सम्पादक तथा कलरिस्ट हुन् ।
गीतमार्फत खरेलले भन्न खोजेका छन् –‘आजको समाजमा मान्छे ‘मान्छे’ रहन सकिरहेको छैन । प्रेम, मूल्य र संवेदनशीलता जस्ता भावनाहरू नाफाको बजारमा हराउँदै गएका छन् ।’
‘राजा रङ्क एउटै भए, तिम्रो नगरमा
मायालुले माया भुल्ने, यो शहरमा’
यो गीत खरेलको सिर्जनात्मक यात्राको एउटा अर्को महत्वपूर्ण अध्याय पनि बनेको छ । शब्द, स्वर, सङ्गीत र दृश्यको मिठासपूर्ण मिश्रणको रुपमा तैयार भएको ‘दूरदेखि आएँ प्रिय’ केवल गीत मात्र नभइ, यसलाई समाजको मनोविश्लेषणको रुपमा समेत लिन सकिने खरलले बताए । यो गीतले केवल मनोरञ्जनका लागि मात्र नभई आम रुपमा सम्बन्धहरुको सोच र संवेदनालाई पनि सँगै बोकेको उनको भनाई रहेको छ ।
