बहुचर्चित राष्ट्रवादी चलचित्र ‘काँडेतार’ का कथाकार, निर्देशक एवं नायक नवल खड्काले आज पत्रकार सम्मेलनको आयोजना गरे पश्चात् सामाजिक सञ्जाल मार्फत प्रेस विज्ञप्ति प्रकाशित गर्दै ‘काँडेतार’ नचलाउने घोषणा गरेका छन् l हिजोबाट देशैभर प्रदर्शनमा आएको चलचित्र काँडेतारमाथि ठूलो ष^डयन्त्र भएको दावी गर्दै निर्देशक/कलाकार खड्काले सो घोषणा गरेका हुन् l खड्काले उक्त चलचित्र कहिलेसम्म नचलाउने भन्ने कुरा चाहिँ विज्ञप्तिमा खुलाएका छैनन् l
प्रकाशित प्रेस विज्ञप्तिमा भनिएको छ- ‘चलचित्र काँडेतारको प्रदर्शन मिति २०८० वैशाख ११ गते सेन्सर पास गरेपछि करिब एकवर्ष अघि नै घोषणा गरिएको थियो । तर प्रदर्शन मिति नजिकिदै गर्दा चलचित्रलाई असफल बनाउन चौतर्फी देशी-विदेशी खुफियाहरु र स्वदेशभित्रैका त्यसका मतियारका रुपमा केही तत्वहरू सलबलाईरहेका थिए । चलचित्रकाई सुरुआती चरणमा नै विवादित बनाउने प्रयास भयो । यसलाई सेन्सर बोर्डले काँटछाँट गर्न लगायो । त्यसपछि विभिन्न चरणमा यसका निर्माता र कलाकारहरुलाई प्रत्यक्ष अप्रत्यक्ष ध^म्की आउन थाल्यो । प्रचार यसरी हुन थाल्यो कि यो चलचित्र कुनै अमुक मुलुक विरोधी हो । यसकारण केही मधेश र हिमालका अति विवादित व्यक्तिहरुले यस चलचित्रलाई प्रतिवन्ध गर्न दबाब दिँदै नत्र सिनेमा हलमा आगो लगाउने सम्मका वक्तव्यवाजी गरे ।
अन्तिम चरणमा केही हल मालिकहरु पनि काँडेतार चलचित्रमाथि अपरोक्ष बाधक बन्न पुगे । ती हलवालाहरुले चलचित्र प्रदर्शन सम्बन्धी आम प्रचलनलाई मिच्दै काँडेतार चलचित्रलाई पर्याप्त शो दिएनन् । स्मरण रहोस् विदेशी हिन्दी फिल्मलाई करिव ११५ वटा शो हल उपलब्ध गराइएको छ । अङ्ग्रेजी फिल्मलाई करिव ७० वटा शो हल उपलब्ध गराइएको छ । चलचित्र शोमा प्राइम टाइम अति महत्वपूर्ण मानिन्छ । यही समयमा दर्शकहरु चलचित्र हेर्न निस्कन्छन् । तर चलचित्र काँडेतारलाई यस्तो प्राइम टाइम उपलव्ध गराइएन । तर रातारात सेन्सर गरेर जुधाउन ल्याईएका दुई अन्य चलचित्र प्रत्येकलाई करिव ८०/९० वटा शोहरू प्राईम टाईममा दिईएको छ । तर हाम्रो देशभक्तिपूर्ण चलचित्र ‘काँडेतार’ लाई मुश्किलले करिव २३ वटा शो दिईएको थियो । ती पनि अधिकांश शोहरू बिहान ८,९ र १० बजेका छन् । जुन समय दर्शकहरू घरका दैनिक चर्यामा व्यस्त हुन्छन् l
हामीलाई थाहा थियो कि हामीमाथि संगठित गिरोह खनिएको छ । तर यसमा चलचित्र हलहरुबाट शो दिइँदा प्राइम टाइममा गडबडी हुन्छ भन्ने हाम्रो कल्पनाभन्दा बाहिरको कुरा थियो । अन्तिम घडिमा चाल पाइयो तर त्यसबेला हामीले काँडेतारको प्रदर्शन रोक्न सम्भव थिएन । त्यसैले हामीले संकेतात्मक रुपमा चलचित्र शो गर्ने र आजबाट नै रोक्ने निर्णय गरेका थियौं, जुन कुरा हामीले चलचित्र हलवालालाई हिजो फागुन २५ मा नै जानकारी गराएका थियौं ।
हामीले काँडेतार निर्माण गर्ने कुरा गरेदेखि नै विभिन्न अपमान र लाञ्छना भोग्दै आएका थियौं । देशभक्ति चलचित्रमाथि किन यति धेरै विभेद ? हामीले देशभक्तिपूर्ण चलचित्र बनाउनु के अपराध गरेकै हौँ ? के देशभक्ति कथामा बनेका चलचित्र चलचित्र नै होइनन् ? ब्यवहारमा यस्तै देखियो । यसको जवाफ हामीलाई सम्बन्धित सरोकारवालाले एकदिन दिनैपर्छ । अत: यसरी देशभक्तिपूर्ण चलचित्रमाथिको भद्दा मजाक हामीलाई सह्य छैन। यो देशभक्तिपूर्ण चलचित्रको अपमान मात्र होइन, यो सिङ्गो देश र देशभक्त नागरिकहरुको समेत ठूलो अपमानको रूपमा हामीले लिएका छौँ । त्यसैले हिजो फागुन २५ गतेबाट प्रदर्शनमा आएको देशभक्तिपूर्ण चलचित्र काँडेतार आजबाट प्रदर्शन नगर्ने/नगराउने निर्णय गरेको जानकारी गराउदछौँ । यसबाट पर्न गएको असुबिधाप्रति दर्शक अनि आम नेपाली आमाबुबा, दाजुभाइ, दिदीबहिनीहरुप्रति क्षमाप्रार्थी छौँ । हामीलाई प्रत्यक्ष/अप्रत्यक्ष रूपमा सहयोग गर्नुहुने सबै सबैप्रति ऋणि रहने छौँ । यो वा त्यो बहानामा चौतर्फी घेराबन्दी गरि देशभक्तिपूर्ण चलचित्र काँडेतारलाई सिध्याउन लाग्ने धमिरा देशी-विदेशी तत्त्वसँग मेरो जीवनको निरन्तर चलचित्र यात्राको क्रममा हिसाब लिने छु l मैले नसके पनि भावी पुस्ताले लिनेछन् र लिनुहोला । बिचार कहिल्यै मर्दैन । सिमानामा काँडेतार लगाएर माटो र मान्छे जोगाउने अभियानमा निरन्तर लाग्ने प्रण गर्दछौँ र आमा, देश र देशभक्त नेपालीजन अनि मनप्रति पुन: एकपटक सम्मान ब्यक्त गर्दछौं ।’
