विश्वकीर्तिमानी गीतकार तथा उपन्यासकार डा. डी. आर. उपाध्यायको नयाँ गीत ‘मन बिगार्यो स्त्री जातैले’ को भिडिओ सार्वजनिक भएको छ । ‘मन बिगार्यो स्त्री जातैले, तन बिगार्यो लोकलको मातैले’ गीतको भिडिओ डीआर म्युजिक क्रियशन मार्फत आजै सार्वजनिक भएको हो । बाबुल गिरीको सङ्गीत तथा सङ्गीत सङ्योजन, एचबीएन किस्मतको मिक्सिङ तथा माष्टरिङ रहेको यस गीतमा प्रतापदास र रचना रिमालको स्वर रहेको छ ।
माइकल चन्दको निर्देशन रहेको यस गीतको भिडिओमा पुष्प खड्का, सुधिर श्रेष्ठ, प्रियना आचार्य र उषा उप्रेतीलाई फिचरिङ गरिएको छ । भिडिओमा अनिता ग्वाचाको शृङ्गार रहेको छ भने माइकल स्टेप अप आर्ट एण्ड एकेडमीको कोरियोग्राफी छ । रोमाण्टिक भावको यस गीतको भिडिओमा उत्सव दाहालको छायाङ्कन र शिलन लम्सालको भिडिओ तथा कलर सम्पादन रहेको छ । एउटा फरक स्वादको गीतको भिडिओ दर्शकमाझ प्रस्तुत गरेको निर्देशक माइकल चन्दले बताए ।
गीतसङ्गीत तथा विविध विधामा गिनिज बुक अफ वर्ल्ड रेकर्ड सहित १०८ विश्व कीर्तिमान कायम गरेका डा. उपाध्यायका ३३ गीति एल्बमका सयौं गीत र भिडिओ दर्शकमाझ आएका छन् । यस्तै उनका ‘बज्रघात’, ‘त्यागी’, ‘भाग्यचक्र’, ‘अपवित्र छाया’, ‘स्वार्थी’, ‘बिटुली’, ‘अतिरिक्त’, ‘दगाबाज’, ‘अधुरो प्रेम’, ‘सपनाकी रानी’, ‘कफी लभ’, ‘मेरी प्रिया’, ‘भाइरस लभ’जस्ता उपन्यास पाठकमाझ आएका छन् । कीर्तिमानी गीतकार डा. उपाध्याय दर्जनौ अवार्ड, पुरस्कारबाट सम्मानित भईसकेका छन् ।
