ज्योति फिल्मस् म्युजिक अवार्ड-२०७८ एक समारोहबीच सम्पन्न भएको छ । समारोहमा वरिष्ठ कवि एवं गीतकार सुरेन्द्र महर्जन ‘अमर’ ज्योति फिल्मस् लाइफटाइम एचिभमेन्ट अवार्ड -२०७८ बाट सम्मानित भएका छन् । ‘अमर’ लाई लोकसम्राट कुमार बस्नेत, वरिष्ठ कलाकार एवं निर्देशक तुलसी घिमिरे र चलचित्र विकाश बोर्डका अध्यक्ष दयाराम दाहालले संयुक्त रुपमा सम्मान अर्पण गरेका थिए ।
तीन दशकभन्दा लामो समयदेखि साहित्य सृजना, दुई दशकभन्दा अघिदेखि साङ्गीतिक यात्रा र दुई दशकभन्दा बढी चित्रकला यात्रामा निरन्तर क्रियाशील साहित्यकार ‘अमर’ लाई उनको योगदानको उच्च मूल्याङ्कन गर्दै सो सम्मान अर्पण गरिएको कुरा आयोजकले बताएका छन् ।
अवार्ड समारोहमा वरिष्ठ गायक लोकसम्राट कुमार बस्नेत, वरिष्ठ कलाकार एवं निर्देशक तुलसी घिमिरे, वरिष्ठ गायिका देविका वन्दना, चलचित्र विकाश बोर्डका अध्यक्ष दयाराम दाहाल, वरिष्ठ सङ्गीतकार राजु सिंह, नायक आकाश श्रेष्ठ र नायिका पूजा शर्मा समेत ज्योति फिल्मस् सम्मान-२०७८ बाट सम्मानित भएका थिए । कार्यक्रम दयाराम दाहालको प्रमुख आतिथ्यतामा सम्पन्न भएको थियो । सविता पोख्रेल र राजु बोहरा लगायतका सञ्चारकर्मीहरुलाई समेत सम्मान गरिएको सो समारोहमा ३५ विधाका सर्जक, कलाकार र प्राविधिकहरुले अवार्ड प्राप्त गरेका थिए ।
