कीर्तिमानी गीतकार डा. डी. आर. उपाध्यायको विभिन्न ५० भाषाको आधुनिक गीति एल्बम ‘मन मोहिनी’ सार्वजनिक भएको छ । राजधानीमा बुधबार एक कार्यक्रमबीच विश्व भाषा क्याम्पसका प्राध्यापक तथा स्पेनिश भाषा प्रमुख रमेश श्रेष्ठ, सङ्गीतकारहरु सूर्य दयालु, सन्तोष श्रेष्ठ, सागर अधिकारी ‘शरद’, मिलाप फाउण्डेशनकी अध्यक्ष गीता अधिकारी, अग्रज पत्रकार तुलसी गिरी ‘भावुक’, दीपक श्रेष्ठ लगायतले सो एल्बमको संयुक्त रुपमा विमोचन गरेका थिए ।
सन्तोष श्रेष्ठको सङ्गीत रहेको ५० लाइनको सो गीतमा नेपाली भाषामा सन्तोषकै, हिन्दीमा गीतकार डीआरको र अन्य ४८ भाषामा प्रकाश तिमिल्सिनाको स्वर रहेको छ ।
गीत नेपाली, हिन्दी, जापानी, चिनिया, अङ्ग्रेजी, रुसी, कोरियाली, फ्रान्सेली, स्पेनी, इटालियन, जर्मन, थाई, मौरिसियन, उर्दु, स्वेडिस, क्रोसियन, हेब्रु, पोर्तुगाली, बंगाली, संस्कृति, स्टोनियन, भियतनामी, डच, सिंहाली, स्लोभेनियन, इन्डोनेसियन, रुमानी, फिनिस, पेरुभियन, टर्किस, ग्रिक, फिलिपिनो, अल्बानियन, युक्रेनियन, अफ्रिकी, स्लोभाकिया, सर्बियाली, पानामियन, नर्वेजियन, आइसल्यण्डीक, बर्मेली, कोल्म्बीयन, कुर्डिस, स्वाहिली, पोलिस, बोलिभियन, हङ्गेरियन, डेनिस, लात्भियन र आर्मेनियन भाषामा रहेको छ ।
एल्बम सार्वजनिक समारोहमा सङ्गीतकार सूर्य दयालुले डा. उपाध्यायले सधै फरक काम गर्ने क्रममा अर्को नयाँ फरक गीत सार्वजनिक गरेको भन्दै यसमा रहेको सङ्गीत पनि त्यतिकै राम्रो रहेको बताएका थिए भने विश्वभाषा क्याम्पसका प्राध्यापक रमेश श्रेष्ठले भाषागत रुपमा गीतमा रहेको भाषाको स्वराङ्कन राम्रो रहेको टिप्पणी गरे । सङ्गीतकार सन्तोष श्रेष्ठले यसअघि विभिन्न १२ देशका भाषामा गीत तयार गरेकोमा फेरि पचास भाषामा गीत सार्वजनिक गर्न पाउँदा निकै हर्षित भएको बताउँदै डा. उपाध्यायले हेरकपल्ट नयाँ र फरक कार्य गर्न खोज्ने क्रममा यसको जन्म भएको बताएका थिए ।
यस्तै गीतका रचनाकार डा. उपाध्यायले आफूले आफ्ना लागि मात्र नभएर समाज र देशलाई चिनाउनका लागि फरक कार्य गर्दै आएको दाबी गरे । डा. उपाध्यायको यसअघि १२ भाषामा रहेको गीति एल्बम सार्वजनिक भएको थियो । समारोहमा सञ्चारकर्मीहरू र गीत सङ्गीतका विभिन्न व्यक्तिहरूको उपस्थिति रहेको थियो ।
गीतसङ्गीत तथा साहित्य सिर्जनाबाट थुप्रै विश्व रेकर्ड कायम गर्ने डा. उपाध्याय पहिलो नेपाली सर्जक हुन् । कीर्तिमानी डा. उपाध्यायका २५ एल्बमका सयौं गीत स्रोता/दर्शकमाझ आईसकेका छन् ।
यसअघि गीत सङ्गीत र साहित्यका विभिन्न विधामा गिनिज बुक रकेर्ड सहित ८० विश्व रकेर्ड कायम गरिसकेका कीर्तिमानी सर्जक डा. उपाध्यायले यही चैत १८ मा थप विश्व कीर्तिमान र आठ गीति एल्बम सार्वजनिक गर्ने कुरा थाहा भएको छ ।
उनका ‘बज्रघात’, ‘त्यागी’, ‘भाग्यचक्र’, ‘अपवित्र छायाँ’, ‘स्वार्थी’, ‘बिटुली’, ‘अतिरिक्त’, ‘दगाबाज’, ‘अधुरो प्रेम’, ‘सपनाकी रानी’, ‘कफी लभ’ र ‘मेरी प्रिया’ जस्ता उपन्यास पाठकमाझ आएका छन् भने नयाँ उपन्यास ‘भाइरस लभ’ पनि छिट्टै सार्वजनिक हुने जानकारी प्राप्त भएको छ ।
