विश्व कीर्तिमानी गीतकार डा. डी.आर. उपाध्यायले फरक फरक र अनौठा शैलीका कार्य गर्नुहुन्छ । यस्तैमा उहाँको एउटा गीत एउटै झोलुङ्गे पुलमा छायाङ्कन गरिएको छ । उपाध्यायको ‘चाँदनी चाँदनी चाँदनी…’ गीतको भिडिओ शनिबार साँखु स्थित झोलुङ्गे पुलमा छायाङ्कन गरिएको हो । उपाध्यायकै सङ्गीत र स्वर रहेको यस गीतको भिडिओमा निर्देशन पनि उहाँकै रहेको छ । भिडिओमा डी.आर. आफैँले अभिनय गर्नुभएको छ भने उहाँलाई समृद्धि श्रेष्ठले साथ दिनुभएको छ ।
‘मैले हरेक समय केही फरक गर्ने सोचका साथ विभिन्न गीत गरिरहेको छु l तिनीहरूले विश्व रेकर्ड पनि कायम गर्न सफल भएका छन् । यतिबेला पनि यस्तै केही फरक गरौँ भनेर यो गीतको छायाङ्कन फरक शैलीमा गरेको हुँ l एउटै गीत एउटै झोलुङ्गे पुलमा यसअघि विश्वमै छायाङ्कन भएको छैन’ डा. उपाध्यायले भन्नुभयो । उहाँका अनुसार गीतकार, सङ्गीत, निर्देशन, कलाकार एकैजना र एउटै झोलुङ्गे पुलमा छायाङ्कन गरिएको यो विश्वको पहिलो गीत हो ।
उत्सव दाहालले छायाङ्कन गर्नुभएको यस गीतको भिडिओमा अनिता ग्वाच्छाको शृङ्गार रहेको छ । छायाङ्कनमा सुनिता खनाल, सुविन गदार, यमबहादुर घर्ती लगायतको सहभागिता रहेको थियो । गीतको भिडिओ केही समयपछि डीआर म्युजिक क्रियसन मार्फत् सार्वजनिक गरिने बताइएको छ ।
