चलचित्र बिकाश बोर्डद्वारा आयोजना भएकोको आदिबासी तथा विभिन्न मातृभाषी चलचित्रहरु मध्येबाट सर्वोत्कृष्ट चलचित्र घोषित भएर राष्ट्रिय चलचित्र पुरस्कार प्राप्त गरेको चलचित्र लोजिमाको सुनिता थेगिम र आशाहाङ आङबोको स्वरमा रहेको पहिलो गीत आती केवा (कहाँ छौ) सार्वजनिक भएको छ | स्वर्गीय चन्द्र माङयुङको शब्द, अशोक कुमार राइको म्युजिक एरेन्ज रहेको सो गीतमा आशाहाङ आङबोको सङ्गीत रहेको छ | भिडिओमा नायिका बिमला लिम्बु, आशाहाङ आङबो र निशाम तुम्बापोको जीवन्त अभिनय रहेको छ |
हालसम्म निर्माण भएका लिम्बु भाषाका चलचित्रहरुमा लोजिमाले मात्र नेपाल सरकार चलचित्र बिकाश बोर्डद्वारा राष्ट्रिय पुरस्कार पाएको छ |हालसम्म ४५ स्थानमा ११० भन्दा बढी विशेष शो भएको लोजिमाले दर्शकको अपार माया, साथ र सदभाव पाएको छ | १२ औं नेपाल अफ्रिका अन्तर्राष्ट्रिय फिल्म फेस्टिभल ( NAFF ), ओप्सना म्युजिक एण्ड फिल्मस अवार्डमा सर्वोत्कृष्ट चलचित्रको अवार्ड, दोश्रो राष्ट्रिय आदिवासी म्युजिक एण्ड फिल्मस अवार्ड २०८१, एफ. एल. एफ. अवार्ड, बिराट म्युजिक एण्ड फिल्मस् अवार्ड, भारतको कोलकातामा आयोजना भएको इन्डो नेपाल फेस्टिवल लगायत करिब एक दर्जन अवार्ड र १६ विधामा सर्वोत्कृष्ट चलचित्रको अवार्ड प्राप्त गरेको लोजिमा अन्य विधामा समेत पटक पटक सम्मानित भइसकेको छ |
लिम्बू समुदायका धार्मिक, सांस्कृतिक र परम्परात्मक रीति रिवाजसँग सम्बन्धित कतिपय महत्वपूर्ण प्रचलनहरु समेत प्रस्तुत गरिएको यो चलचित्र वियोगान्त प्रेमकथामा आधारित रहेको छ l चलचित्रमा बाध्यात्मक परिस्थितिका कारण आफ्नी प्रेमिकालाई छाडेर अर्कै युवतीसँग विवाह गरेपछि भताभुङ्ग भएको नायकको जीवन र आफ्नो प्रेमीले अर्कै केटीसँग विवाह गरेपछि विक्षिप्त बनेकी नायिकाको कारुणिक अवस्थाको बेजोड प्रस्तुति रहेको छ l पाथीभरा च्यानलको ब्यानरमा निर्माण भएको यस चलचित्रमा विशेष प्राविधिक सहयोगीको रुपमा निर्देशक वसन्त अधिकारीले साथ दिएका छन् l
चलचित्रमा सञ्जय अधिकारीको सम्पादन र अशोक राईको पार्श्व सङ्गीत रहेको छ भने साउण्ड डिजाइन मानषी किरणले र पोष्टर तथा स्टिकर डिजाइन आइडियल डिजाइनर्सका निर्देशक सुन्दर श्रेष्ठले गरेका छन् l सागर सुब्बाको कथा/निर्देशन रहेको यस चलचित्रको पटकथा/संवाद सागर केरुङ्ले लेखेका हुन् l चलचित्रमा बिमला खजुम लिम्बूको अलावा आशाहाङ आङ्बो, सागर केरुङ, निशाम तुम्बापो, रुद्र पहिम, नुनाम केरुङ, हस्त लिबाङ, सहाराहाङमा पन्धाक लिम्बू, सेरिना राई, बिनी सुब्बा, आस मुरिङ्ला, प्रयास राई, निर्मल पन्धाक, सन्जन सुब्बा, देवी लिम्बू, ज्ञानु खम्दाक, लगायतका कलाकारहरुको अभिनय रहेको छ l
यसैगरी चलचित्रमा निर्माता आशाहाङ आङ्बो र कार्यकारी निर्माता पम्फावती राई रहेका छन् भने मुख्य सहायक निर्देशकमा दीपक अधिकारी, छायाकार रविन्द्र बराल र मेकअप आर्टिष्ट नरेश खरेल रहेका छन् l अशोक लोहरुङ राईको म्युजिक एरेन्ज रहेको यस चलचित्रमा मनु नेम्बाङ, सुनिता थेगिम र आशाहाङ आङ्बोको स्वर रहेको छ । चलचित्रको पोष्ट प्रोडक्सन भिजन नेपाल फिल्मसले गरेको हो भने र स्वराङ्कन एम. के. प्रोडक्सनमा भएको हो l
