गीतकार तथा मोडल भुवन लोहनीले आफ्नो नयाँ गीत ‘कुन देवको सृष्टि हौ’ को भिडिओ सार्वजनिक गरेका छन् । क्रिशमस २०२४ को अवसर पारेर बुधबार यो भिडिओ सार्वजनिक गरिएको गीतकार भुवनले बताए । भिडिओ कृपा फाउन्डेसनको अफिसियल च्यानलबाट सार्वजनिक गरिएको छ । गीतमा सविन सुवेदी र समीक्षा अधिकारीको स्वर तथा वसन्त सापकोटाको सङ्गीत रहेको छ । यो गीतलाई डोरेमी स्टुडियोमा भानुभक्त ढकालले रेकर्डिङ र श्याम बागदासले मिक्सिङ तथा मास्टरिङ गरेका हुन् ।
प्रेम भावमा तयार पारिएको यस गीतको भिडिओमा भुवन लोहनी र उषा उप्रेतीको अभिनय रहेको छ भने गीतको भाव अनुसारकै भिडिओ पनि तयार गरिएको छ । भिडिओमा भुवन र उषाको जोडी सुहाएको छ । उनीहरु बीचको प्रेम सम्बन्धलाई भिडिओमा कथानक रुपमा प्रस्तुत गरिएको छ । भिडिओ मौसम हिमालीले निर्देशन र कोरियोग्राफी गरेका हुन् । नवराज उप्रेतीले खिचेको यो गीतको भिडिओमा रङ्ग तथा दृश्य सम्पादन मनोज कार्कीको रहेको छ । केही वर्ष यताबाट अमेरिकामा बस्दै आएका लोहनीले आधा दर्जन भन्दा बढी भिडिओमा मोडलिङ गरिसकेका छन् । मोडल भुवनको अघिल्लो महिना बाबा आमा गीतको भिडिओ रिलिज भएको थियो भने लगत्तै उनकै अभिनयमा यो नयाँ गीतको भिडिओ सार्वजनिक भएको हो ।
