गीतकार सङ्घ नेपालले आज एक विज्ञप्ति प्रकाशित गरी आफ्नो सङ्घका सदस्य एवं प्राज्ञ टिका चाम्लिङ राईलाई आर्थिक सहयोगका लागि अपिल गरेको छ l केही महिना अघिदेखि क्यान्सरको उपचार गराईरहेका गीतकार चाम्लिङको उपचारमा ठूलो धनराशी खर्च भईसकेको र आर्थिक अभाव हुँदै गएको भन्दै स्वदेश तथा विदेशमा रहेका सर्जक, कलाकार, प्राविधिक एवं समग्र गीत-सङ्गीतप्रेमी शुभचिन्तकहरुलाई सहयोगको लागि सङ्घले अपिल गरेको हो l
सङ्घका अध्यक्ष वसन्त बित्यासी थापाद्वारा हस्ताक्षरित विज्ञप्तिमा भनिएको छ – ‘लोकप्रिय गीतकार तथा यस सङ्घका सदस्य प्राज्ञ टीका चाम्लिङ राई अचानक अस्वस्थ भई विगत केही महिनादेखि उपचारको क्रममा रहनुभएको र हाल उहाँलाई क्यान्सर देखिएको जानकारी हुन आएको हुँदा संस्थागत रुपमा यस कार्यलयबाट उहाँको स्वास्थ्य अवस्थाबारे जानकारी लिने काम पनि गरिरहेका छौं । अत: उहाँको उपचारमा के कति समय लाग्ने हो ? के कति खर्च हुने हो ? अहिलेसम्म यकिन हुन सकेको छैन ।
उपचार गर्ने क्रममा ठूलो धनराशी खर्च भईसकेको र खर्चको अभाव हुँदै गएकोले यस सङ्घका अध्यक्ष बसन्त वित्यासी थापाको नेत्तृत्वमा निवर्तमान अध्यक्ष शुभ मुकारुङ, उपाध्यक्ष रमेश कोईराला, महासचिव टिका राई (शिव) र कोषाध्यक्ष चेतन खतिवडाको टोलीले गीतकार प्राज्ञ टिका चाम्लिङलाई निवासमा नै भेटेर स्वास्थ्य स्थितिको बारेमा जानकारी लिएपछि सङ्घको तर्फबाट नगद रु.२५ हजार आर्थिक सहयोग समेत गरेका छौं ।
उहाँको जीवन रक्षाका लागि व्यक्तिगत र संस्थागत रुपमा आर्थिक सहयोग गरिदिनु हुन स्वदेश तथा विदेशमा रहनुभएका सर्जक, कलाकार, प्राविधिक एवं समग्र गीत-सङ्गीतप्रेमी शुभचिन्तकज्यूहरुमा गीतकार सङ्घ नेपाल हार्दिक अपिल गर्दछ l ईच्छुक दाताहरुले सिधै यस सङ्घको एभरेष्ट बैंकको खाता नम्बर ००१००१०५२००८४७ (गीतकार सङ्घ नेपाल) मा जम्मा गरिदिनु हुन वा सङ्घका अध्यक्ष बसन्त वित्यासी थापा (९८४९६११२३९), महासचिव टिका राई ‘शिव’ (९८५२८९०३८३) र कोषाध्यक्ष चेतन खतिवडा (९८५११६७२९२) लाई सम्पर्क गर्नुहुन समेत हार्दिक अनुरोध गर्दछौं ।‘
