दोस्रो संस्करणको ए. एम. एस. इन्टरनेसनल अनर अवार्ड तथा सांस्कृतिक कार्यक्रम जापानमा सम्पन्न भएको छ । ए. एम. एस. इन्टरटेण्मेण्ट र सनराइज कम्पनी जापानले संयुक्त रुपमा आयोजना गरेको उक्त अवार्ड जापानको टोकियोमा एक भव्य कार्यक्रमबीच सम्पन्न भएको हो । कार्यक्रममा सहभागी हुन नेपालबाट सेलिब्रेटीहरूको ठूलो समूह जापान पुगेको थियो । कलाकारहरू शिव श्रेष्ठ, भुवन केसी, शम्भुजित बास्कोटा, चेतन सापकोटालगायत अञ्जु पन्त, कमल खत्री, गजित विष्ट, ऋषि धमला र नरेश भट्टराई पनि टोकियो पुगेका थिए ।
समारोहमा सङ्गीतरत्न शम्भुजित बास्कोटालाई दीर्घ साधना सम्मान अर्पण गरिएको थियो । उनलाई नगद रु. ७१ हजार १०१ रुपैया सहित सो सम्मान अर्पण गरिएको हो । विभिन्न २६ विधामा अवार्ड प्रदान गरिएको सो कार्यक्रममा भुवन केसी, शिव श्रेष्ठ, चेतन सापकोटा र ऋषि धमलालाई सम्मान गरिएको थियो । यस्तै जापानमा रहेर कार्य गरिरहेका जेएमई मनि ट्रान्सफर जापानका चेयरमेन ओम गुरुङ, व्यवसायी सङ्घ जापानका अध्यक्ष विजेश थकाली, एनआरएन आइआइसीका उपाध्यक्ष रविन श्रेष्ठ, थकाली सेवा समिति जापानका अध्यक्ष बुद्धि गौचन, एनआरएनए जापानका अध्यक्ष नवीन निउरे, सेतुमाया तामाओके, पासाङ विश्कर्मा, ददिवल खड्का, निमा लामा, राजेन्द्र सुनुवार लगायतलाई पनि सम्मान गरिएको थियो ।
कार्यक्रममा विभिन्न कलाकारले साङ्गीतिक प्रस्तुति दिएका थिए । ‘पर्यटन, कला र संस्कृतिको प्रबर्धन गर्ने अभियान समृद्ध नेपाल निर्माणमा हाम्रो योगदान’ भन्ने मूल नाराका साथ टोकियोमा ए. एम. एस. इन्टरनेशनल अवार्डको साथमा बृहत् सांस्कृतिक कार्यक्रम सम्पन्न भएको थियो । सांस्कृतिक कार्यक्रममा नेपालबाट गएका र जापानमा रहेका स्थाानीय कलाकारहरूले प्रस्तुति दिएको अवार्ड आयोजककी अध्यक्ष सत्यकला लामाले जानकारी दिएकी छिन् ।
समारोहमा भर्सटाइल गायिका अवार्ड अञ्जु पन्त, वेष्ट पप सिंगर कमल खत्री, वेष्ट कोरियोग्राफर गजित विष्टलगायतलाई अवार्ड प्रदान गरिएको थियो । जापानको आयोजकमा सनराइज कम्पनी अध्यक्ष कर्साङ तामाङ रहेका थिए । नेपाली संस्कृतिलाई विश्वव्यापी बनाउन र जापानमा लामो समय रहेर पेशा व्यवसाय गर्दै आएका नेपाली समुदायलाई आफ्नो भाषा, साहित्य, कला संस्कृतिसँग जोडन यो कार्यक्रमको आयोजना गरिएको अध्यक्ष तामाङले बताए । ए. एम. एस.की अध्यक्ष लामाले समृद्ध नेपाल निर्माणमा योगदान दिने उद्देश्यका साथ नेपालको पर्यटन, कला र संस्कृतिको प्रबर्धन गर्ने अभियानसहित जापानमा भव्य रुपमा अवार्ड सहित सांस्कृतिक कार्यक्रम सम्पन्न भएको बताइन् । सो अवसरमा नेपाली चलचित्रलाई कसरी विश्वव्यापी बनाउन सकिन्छ भन्ने विषयमा अन्तरक्रिया पनि भएको ए. एम. एस.की अध्यक्ष लामा र सनराइज कम्पनीका अध्यक्ष तामाङले जानकारी गराएका छन् ।
