विगत बाह्र वर्षदेखि निरन्तर प्रकाशन हुँदै आएको मिलाप राष्ट्रिय मासिकले ‘मिलाप सम्मान तथा नयाँ वर्ष २०७९ शुभकामना आदान-प्रदान’ कार्यक्रम सम्पन्न गरेको छ । काठमाडौंको कान्तिपथस्थित होटल एल्लो प्यागोडामा आयोजित एक विशेष सामारोहबीच मिलापले पूर्वरक्षामन्त्री भीमसेन दास प्रधानको प्रमुख आतिथ्यतामा शुभकामना तथा मिलाप स्रष्टा सम्मान कार्यक्रम सम्पन्न गरेको हो ।
पहिलो महिला छायाकार तथा नेपाल टेलिभिजन बोर्ड सदस्य सबनम मुखिया, गीतकार सङ्घका पूर्व अध्यक्ष वरिष्ठ गीतकार चूडामणि देवकोटा, रेडियो प्रसार सेवा विकाश समितिका सदस्य तथा वरिष्ठ गायक सीताराम पोख्रेल, सञ्चारिका समूह नेपालकी अध्यक्ष विमला तुम्खेवा लगायतको आतिथ्यतामा सम्पन्न भएको सो कार्यक्रमको शुभारम्भ मेलोडी सुल्तानको नामले समेत परिचित वरिष्ठ गायक तथा सङ्गीतकार शिशिर योगीले ‘यो देशमा म एउटा मान्छे खोजिरहेको छु’ गीतबाट गरेका थिए l
समारोहमा टीका-गोपाल गीतसङ्गीत विशेष सम्मान-२०७९ बाट सङ्गीतकार सन्तोष श्रेष्ठलाई सम्मान गरिएको थियो भने मिलाप राष्ट्रिय व्यक्तित्व सम्मानबाट विशिष्ट कलाकार तथा निर्देशक मोहन निरौला, लय सङ्ग्रौला, विश्व कीर्तिमानी गीतकार तथा उपन्यासकार डा.डीआर उपाध्याय, वरिष्ठ कलाकार उत्तम केसी, गीतकार तथा निर्देशक गणेश सुवेदी, गीतकार वसन्त वित्यासी थापा, वरिष्ठ पत्रकार सानुकाजी श्रेष्ठ, सङ्गीतकार दीपक शर्मा, राजेन्द्र बजगाईं र साहित्यकार राधा भण्डारीलाई सम्मान गरिएको थियो ।
यसैगरी सो समारोहमा हास्य कलाकार तथा लोकदोहोरी गायक गोकुल कँडेल, खेलाडी तथा प्रशिक्षक रामदास गोपाली, लोक गायक तथा मोडल देब बहादुर परियार (हिरा), नायक तथा कलाकार विनोद श्रेष्ठ, सञ्चारकर्मी व्यवसायी शिरीषा पौडेल, सङ्गीत संयोजक तथा सङ्गीतकार आशिष अविरल, निर्माता / समाजसेवी यमप्रसाद श्रेष्ठ, चरित्र अभिनेता राजेश विशुराल, समाजसेवी सुमी राई लिम्बू, गीतकार यमलाल कँडेल, सङ्गीतकार कृष्ण भारद्वाज र गायिका रानी शाक्यलाई सम्मान गरिएको थियो ।
यस्तै सो कार्यक्रममा गीतकार कृट क्षेत्री, गायक सरगम राई, गीतकार भुवन शर्मा कँडेल, गीतकार समीर खान, गायक भुवन प्यासी, सङ्गीतकार विशाल ढकाल, गायक अलिप खान, गायक रमेश पाठक, गायिका मञ्जु कुमारी लावती, फिल्म तथा भिडियो सम्पादक दिनशन शाह, म्युजिक भिडिओ निर्देशक केशवराज भट्ट, अधिवक्ता तथा गीतकार राजेन्द्र शर्मा, ध्वनि सम्पादक मनोज परियार र नृत्य निर्देशक गोविन्द प्रभातलाई पनि सम्मान गरिएको थियो ।
लायन हरि दाहाललाई मिलाप कभर हस्तान्तरण समेत प्रदान गरिएको सो समारोहमा वरिष्ठ पत्रकार विजयरत्न तुलाधर, सन्तोष श्रेष्ठ, मोहन निरौला, चूमणि देवकोटा, प्रमुख अतिथि पूर्व रक्षामन्त्री भीमसेनदास प्रधान लगायतले शुभकामना मन्तव्य राख्दै समसामयिक राजनीतिक घटनाक्रमका विषयमा आ-आफ्ना भनाईहरु राखेका थिए ।
मिलाप फाउण्डेशनकी अध्यक्ष तथा मिलाप मासिककी कार्यकारी सदस्य गीता अधिकारी संयोजकत्वमा आयोजित सो कार्यक्रमको सहजिकरण दीप ज्योतिले गरेकी थिईन् भने सभापतित्व मिलाप मासिकका सम्पादक कृष्ण भुसालको रहेको थियो । समारोहमा प्रमुख अतिथिलाई विशेष मायाको चिनो प्रदान गरिएको थियो ।
