रियालिटी शो ‘भ्वाईस अफ नेपाल’ का प्रथम बिजेता तथा गायक, सङ्गीतकार सिडी विजय अधिकारीको स्वरमा रहेको नयाँ गीत ‘तिमीसँग छुट्टिएर’ को भिडिओ रिलिज भएको छ । अमेरिकामा छयाङ्कन गरिएको यो भिडिओ सम्राट क्रियसन युट्युव च्यानलबाट रिलिज गरिएको हो ।
लगभग ५ बर्ष अघिदेखि अमेरिका बस्दै आएका चलचित्र निर्देशक सुमन दाहालले अमेरिकाको लेक्सिन्टन क्षेत्रमा छायाङ्कन गरेर त्यहींबाट यो भिडियो रिलिज गरेका हुन् । गतसाता मात्र उनले अर्को म्युजिक भिडिओ पनि त्यहींबाट रिलिज गरेका थिए । भिडिओमा राजु अधिकारी र निश्मा चापागाईंको मुख्य भूमिका रहेको छ ।
प्रेममा निश्माले धोका दिएपछि राजु एकल भएको बेदनामा भिडियो केन्द्रित छ । यो गीत कल्पना पाठकले लेखेकी हुन् । गीतमा गायक सिडी विजयले नै सङ्गीत गरेका छन् । वियोगान्त भावको यो गीतमा राजु कार्कीको सङ्गीत संयोजन रहेको छ । भिडिओको छायाङ्कन तथा सम्पादन अक्की शर्माले गरेका हुन् । जसमा भूपेन्द्र अधिकारीको मिक्सिङ र रेनिश फागोको रङ्ग संयोजन रहेको छ ।
