भ्वाइस अफ नेपालमा भाग लिनका लागि काठमाण्डौ छिरेका अजय कार्कीले प्रतिस्पर्धामा विजयी हुने सपना पूरा नगरे पनि गायनमा लाग्नुको औचित्य भने पूरा गरेका छन् । उनले राष्ट्रिय भावको गीतबाट आफ्नो गायन यात्रालाई अगाडि बढाएका छन् ।
कार्कीले सिलौटो क्याफे अनामनगरमा पत्रकारहरुलाई भेला पारेर आफ्नो नयाँ गीत हामी देश बचाऔं को भिडिओ सार्वजनिक गरेका हुन् । सञ्चारकर्मी हरिराम पौडेल, म्यूजिक खबरकी सम्पादक सबिता पोखरेल, प्रेस काउन्सिल नेपालका कुशल आचार्य, गायक चिरञ्जीवी भण्डारी लगायतको उपस्थितिमा उनले गीतको भिडिओ सार्वजनिक गरेका हुन् । कार्यक्रममा अतिथिहरुले राम्रो सम्भावना बोकेका गायक कार्कीलाई सफलताको शुभकामना समेत दिएका थिए ।
हामी देश बचाऔं गीतमा शब्द, सङ्गीत र स्वर अजय कार्कीकै रहेको छ भने सञ्जीब बराइलीले सङ्गीत संयोजन गरेका छन् । भिडिओमा राजेश हमाल, शिशिर भण्डारी, दिपेन्द्र सोनाम, गीता ढुंगाना, कविता न्यौपाने, सुनिम गुरुङ, सरोन गुरुङ, एन्जेल गुरुङ र ज्योत्स्ना थापा मगरको अभिनय रहेको छ । उत्सव दाहालको छायाङ्कन रहेको यस भिडिओको सम्पादन भने विष्णु खड्काले गरेका हुन् । अमोन रानाको कोरियोग्राफी रहेको यस भिडियोको निर्देशन निरेन श्रेष्ठले गरेका हुन् । भिडियो अजय कार्कीको युट्यूब च्यानलबाट सार्वजनिक गरिएको छ ।
