आगामी १७ जेठबाट देशव्यापी रुपमा प्रदर्शनमा आउन लागेको चलचित्र ‘कप्स’ को दोस्रो तथा आईटम गीत ‘सुन्दरी देखेर आँखा सन्कियो’ रिलिज भएको छ । सुरेन्द्र रानाको शब्दरचना र स्वयम्भुराज शाक्यको सङ्गीत रहेको यो गीतमा मिना निरौला र स्वयम्भुराज शाक्यले स्वर दिएका छन् । कविराज गहतराजको कोरियोग्राफी रहेको यस गीतमा कलाकार रिया प्रधानको आकर्षक नृत्य रहेको छ ।
चलचित्र सम्राट सापकोटाको निर्देशनमा निर्माण भएको हो । उनका अनुसार चलचित्रमा कथा अनुसार नै यो आईटम गीत राखिएको हो । यो चलचित्र प्रहरी सेवाको कथामा केन्द्रित रहेको कुरा समेत निर्देशक सापकोटाले बताएका छन् ।
प्राप्त जानकारी अनुसार चलचित्रमा अनुपविक्रम शाही, सन्दिपा लिम्बू, अमित गिरी, रामराज क्षत्री, अनुपमा भण्डारी, निरुता स्याङ्तान, सुन्दर श्रेष्ठ लगायतका कलाकारको अभिनय रहेको छ । आर्या मुभिज र साराश्री मुभिजले संयुक्त रुपमा निर्माण गरेको यो चलचित्रमा निर्देशक सम्राट सापकोटाकै लेखन रहेको छ भने सुसन प्रजापतीले छायाङ्कन र विपिन मल्लले सम्पादन गरेका हुन् । चलचित्र राम शाक्यको लगानीमा निर्माण भएको हो ।
