यसअघि चैत १५ मा रिलिज हुने भनिएको फिल्म ‘गोपी’ माघ १८ मै रिलिज हुने भएको छ । दीपेन्द्र लामाको निर्देशन रहेको फिल्म गोपीमा विपिन कार्की, वर्षा राउत र सुरक्षा पन्तको मुख्य भूमिका रहेको छ । विपिन र सुरक्षाले पहिलोपटक सँगै काम गरेका हुन् ।
फिल्मको पोष्ट प्रोडक्सन पनि चाँडै सकिएको र देशविदेशका दर्शकले फिल्म अलि छिट्टै रिलिज गर्न आग्रह गरेपछि माघ १८ मा रिलिज गर्न लागिएको निर्देशक दीपेन्द्र लामाले बताए । आफ्नो पहिलो फिल्म ‘घामपानी’ ले जस्तै गोपीले दर्शकलाई सन्तुष्ट बनाउने दावी लामाको छ ।
गोपीलाई नेपालभर मनोठ राठी र उज्ज्वल पौडेलको वैंकेटस इन्टरटेनमेन्टले वितरण गर्ने छ । निर्माता मणिकर्ण केसी र वितरकका तर्फबाट मनोज राठीले सोमबार वितरण सम्झौतापत्रमा हस्ताक्षर गरेका छन् । ‘फिल्मको रिलिजबारे विभिन्न मितिको अध्ययन गर्दा सबैभन्दा अनुकूल माघ १८ देखिएकोले पनि हाम्रो छनोटमा उक्त दिन परेको हो’ निर्माता केसीले प्रष्ट्याए ।
आरोही इन्टरटेनमेन्टको ब्यानरमा बनेको ‘गोपी’ का कार्यकारी निर्माता श्रीधर पौडेल हुन् । एमए पढेर पनि गाईपालनमा होमिएका एक युवकको संघर्षकथा फिल्ममा समेटिएको पटकथा लेखक सामिप्यराज तिमल्सिना अवगत गराउँछन् ।
काठमाडौंको टोखा क्षेत्रमा छायांकन गरिएको ‘गोपी’ मा शैलेन्द्रध्वज कार्कीको सिनेम्याटोग्राफी, निमेष श्रेष्ठको सम्पादन, न्ह्यू बज्राचार्य, अर्जुन पोखरेल र कल्याण सिंहको सङ्गीत तथा विप्लव प्रतीक र बुद्धिसागरको गीत समावेश छ ।
