केकी अधिकारी र निराजन प्रधान अभिनित तथा सरोज अधिकारीको स्वरमा रहेको गीत ‘भोलि… ‘ सार्वजनिक भएको छ । लामो समयदेखि अमेरिकामा बसोबास गर्दै आएका युवा गायक अधिकारीले ‘भोलि’ नामको मनछुने गीतको भिडियो बजारमा ल्याएका हुन् ।
२०६६ सालमा ‘प्रभाव’ नामको एल्बम लिएर आएका गायक सरोज अधिकारीको त्यो समयमा ‘आज धेरै’ भन्ने बोलको गीत सञ्चारमाध्यमहरूमा निकै चर्चामा रहेको थियो । केहीसमय अघि उनले ‘भावना’ नामको एल्बम पनि बजारमा ल्याएका थिए । आफ्नै शब्द, सङ्गीत र स्वरमा सरोजले ‘भोलि’ बजारमा ल्याएका हुन् । गीतको भिडियोमा केकी अधिकारी, निराजन प्रधान र ज्योति काफ्ले लगायतले अभिनय गरेका छन् । अमेरिकामा रेकर्ड भएको यस गीतको भिडियो भने काठमाण्डौमा तयार गरिएको हो । भिडियो बनाउन पुष्कर दाहालले भूमिका खेलेका छन् । यस भिडियोका निर्देशक नितिन चन्द रहेका हुन् ।
सानो उमेरदेखि नै गीत-सङ्गीतमा रुची राख्ने सरोज परिवारको पनि साथ भएकोले साङ्गीतिक क्षेत्रमा प्रगति भएको बताउँछन् । ‘यो क्षेत्र सानै उमेरदेखि रुचीको क्षेत्र हो, नेपालदेखि अमेरिकासम्म आएर पनि निरन्तरता दिँदै छु । नेपाली गीत सङ्गीतलाई जहाँ पुगेपनि माया गरिरहन्छु, श्रोता र दर्शकको माया पाउने आशा भएकाले गाउने पेशा छाड्दिन ।’ गायक अधिकारीले भने ।
एउटा विदेशिएको प्रेमीको कथामा आधारित यो भिडियोमा, प्रेमी आफ्नो उज्ज्वल भविश्वको लागि घरायसी परिस्थितिले विदेशिन पुग्छ । प्रेमी विदेशिए लगत्तै उसकी प्रेमिका ऊसँग बिताएका पुराना दिनहरु सम्झिदै अनि भोलि फेरि भेट हुने आशासँगै कल्पनामा डुब्न पुग्दछे । तर उसको दुर्भाग्य आफ्नो भविष्य बनाएर फर्कने क्रममा उसको प्रेमीको हवाईजहाज दुर्घटनामा निधन हुन्छ । प्रेमिका संधैको लागि आँशुमा डुब्न पुग्छे । भिडियोको कथा सार यस्तो छ । भिडियोका दृश्यहरु नेपालको काठमाडौँ उपत्यका र अमेरिकाको केन्टकी राज्य वरपर छायाँकन गरिएको हो ।
