चलचित्र पत्रकारहरुको एकमात्र छाता संगठन चलचित्र पत्रकार संघले चलचित्र पत्रकारिता दिवस तथा १९ औं वार्षिकोत्सव कार्यक्रमका अवसरमा आफ्ना सदस्य पत्रकारहरुलाई पुरस्कार तथा सम्मान प्रदान गरेको छ l जस अनुसार यसबर्षको राष्ट्रिय चलचित्र पत्रकारिता सम्मानबाट पत्रकारद्वय ध्रुब लम्साल र दयाराम पाण्डे सम्मानित भएका छन् भने जनही २१ हजार नगद सहितको चलचित्र पत्रकारिता पुरस्कार लक्ष्मण सुवेदी र सन्ध्या थापाले प्राप्त गरेका छन् l गत बर्षबाट स्थापना गरिएको पत्रकारिता प्रोत्साहन पुरस्कार यसपटक अन्जान दाहाल मनिषलाई प्रदान गरिएको छ l पत्रकार दाहालले प्रमाणपत्र र ट्रफीको साथमा एकथान ल्यापटप समेत पाएका छन् l
चलचित्र पत्रकार संघका अध्यक्ष सन्दिप सापकोटाको अध्यक्षतामा सम्पन्न सो समारोहमा संचार तथा सूचना प्रविधि मन्त्रालयका राज्यमन्त्री गोकुल प्रसाद बासकोटा, नेपाल पत्रकार महासंघका कार्यवाहक अध्यक्ष बिपुल पोख्रेल, चलचित्र विकाश बोर्डकी अध्यक्ष निकिता पोडेल, वरिष्ठ कलाकार हरिबंश आचार्य लगायत फिल्मकर्मी एबं चलचित्र पत्रकारहरुको उल्लेख्य उपस्थिति रहेको थियो l समारोहमा पत्रकार महासंघ, प्रदेशसभाका सदस्यहरुलाई समेत बधाई ज्ञापनका साथ प्रमाणपत्र वितरण गरिएको थियो l
