काठमाडौं । भारतमा समेत ख्याति कमाएको नेपाली नृत्य कलाकारहरुको समूह ‘द वाइल्ड रिपर्स क्रू’ लाई फिचर गर्दै गायक सन्तोष कालिकोटे आफ्नो नयाँ गीतको म्युजिक भिडियो लिएर दर्शकमाझ आएका छन् ।
सन्तोष कालिकोटेको स्वरको नयाँ गीत ‘जालैमा जालैमा…’ को उक्त म्युजिक भिडियो बुधबार साँझ सार्वजनिक भएको हो । उक्त गीतमा डम्बर हिङमाङको शब्द तथा सङ्गीत रहेको छ भने गोपाल रसाईलीले सङ्गीत संयोजन गरेका छन् ।
द वाइल्ड रिपर्स क्रू केही वर्षअघि स्टार प्लसद्वारा प्रसारित नृत्यमा आधारित रियालिटी शो ‘डान्स प्लस टु’ को फाइनलिष्ट रहिसकेको समूह हो । समूहले नेपाल तथा भारतका थुप्रै स्टेज कार्यक्रमहरुमा व्यावसायिक नृत्य प्रस्तुत गरिरहेको छ । ‘जालैमा..’ को भिडियोमा वाइल्ड रिपर्स ग्रुपसँगै मोडल रिता कट्टेललाई पनि फिचर गरिएको छ ।
अर्जुन अधिकारीद्वारा निर्देशित उक्त म्युजिक भिडियोलाई उत्सव दाहालले छायांकन गरेका हुन् भने सम्पादन निशान घिमिरेको रहेको छ । म्युजिक भिडियोलाई हाइटलाइट्स नेपालको युट्युब च्यानलमार्फत अपलोड गरिएको छ ।
