सांस्कृतिक आदानप्रदान अन्तर्गत नेपाली परम्परात्मक लोक संस्कृति झल्काउने नृत्यहरुको प्रस्तुति दिएर ‘एभरेष्ट कल्चरल ग्रुप’ को टोली हालै स्वदेश फर्किएको छ lकार्यक्रम टर्कीको चनाक्का नगरपालिकाको आयोजनामा चनाक्का शहरमा सम्पन्न भएको थियो भने एक सातासम्म चलेको सो ‘लोक महोत्सव’ मा २० राष्ट्रका ३५ समूहले आ-आफ्नो देशका लोक एबं सांस्कृतिक नृत्यहरुको प्रस्तुति दिएका थिए l नृत्यमा १ हजार भन्दा बढी कलाकारहरुको सहभागिता रहेको कुरा कल्चरल ग्रुपका प्रमुख रामचन्द्र कोईरालाले जानकारी गराएका छन् l टोली रामचन्द्र कोईरालाको नेत्तृत्व र कल्चरल ग्रुपकी निर्देशक शितल आचार्यको संयोजकत्वमा टर्की पुगेको थाहा भएको छ l आफ्नो टोलीका कलाकारहरुले नेपालको प्रतिनिधित्व गर्दै झ्याउरे, तामांग सेलो, मारुनी, धिमाल, सोरठी लगायत १ दर्जन नृत्य प्रस्तुत गरेको कुरा टोली संयोजक आचार्यले जानकारी दिएकी छिन् l नेपालमा यस प्रकारको कार्यक्रमको आयोजना हुँदा सरकारी निकायलाई कुनै वास्ता नहुने गरेको सन्दर्भ उल्लेख गर्दै मेला आयोजना अवधिभर टर्कीका बाटो र घरहरुमा ठूलाठूला राष्ट्रिय झण्डा फहराइएको देख्दा आफ्नै देश सम्झेर दु:ख लागेको कुरा पनि टोली संयोजक आचार्यले म्युजिक डायरीलाई बताईन् l
