-प्रकाश बराईली ‘अभिव्यक्ति’
राष्ट्रिय लोक तथा दोहोरी गीत प्रतिष्ठान नेपाल, उपत्यका समन्वय समितिको आयोजनामा आठौं राष्ट्रिय लोक दोहोरी अवार्ड – २०८० साँस्कृतिक संस्थान राष्ट्रिय नाचघर जमल, काठमाडौंमा यही असौज ११ गतेका दिन सम्पन्न हुँदै छ । ‘आठौं राष्ट्रिय लोक दोहोरी अवार्ड – २०८०’ को अन्तिम संघारमा पत्रकार सम्मेलनको आयोजना गरी विविध बिषयमा जानकारी गराईको छ । अग्रजलाई सम्मान, नव प्रतिभालाई प्रोत्साहन भन्ने मूल नारा सहित यस अवार्डको आयोजना गर्न लागिएको हो । राष्ट्रिय लोक दोहोरी अवाडलार्ई लोक दोहोरी कलाकारहरुले पर्वको रुपमा लिने गर्दछन् ।
बि.सं. २०६२ सालमा स्थापना भएको यस संस्थाले बि.सं. २०६९ सालमा शिब हमाल अध्यक्ष भए लगत्तै ‘पूजा लोक दोहोरी अवार्ड’ सुरु गरेको थियो । बिगतमा कोरोनाको महामारीले केही बर्ष कार्यक्रम सम्पन्न गर्न नसकेता पनि अन्य कार्यक्रम सहित लोक दोहोरी अवार्डले पनि निरन्तरता पाईरहेको छ । ‘आठौं राष्ट्रिय लोक दोहोरी अवार्ड – २०८०’ बिभिन्न २४ वटा बिधामा बितरण गर्न लागिएको छ भने लाईफटाईम अचिभमेन्ट अवार्ड कृष्ण सुधा ढुंगाना, उपत्यका समन्वय विशिष्ट सम्मान (बेबारिसे लास ब्यवस्थापनकी सदस्य) सपना रोका, संस्थागत सम्मान पुरुषोत्तम न्यौपाने, लोक दोहोरी अवार्ड बिशेष सम्मान शिब हमाल, दशकका श्रष्टा सम्मान एक नारायण भण्डारी, सदाबहार लोकगीत सम्मान बाबरी फूलको बोट (पाण्डब सुनुवार), लोक पत्रकारिता पुरस्कार राजकुमार रायमाझी, दोहोरी साँझ कलाकार सम्मान कृष्ण आँशु आदिलाई प्रदान गरिने कुरा पत्रकार सम्मेलनमा घोषणा गरिएको थियो ।
पत्रकार सम्मेलनमा उपत्यका समन्वय समितिका अध्यक्ष अर्जुन थापा मगरको अध्यक्षता रहेको थियो भने प्रतिष्ठानका पूर्व अध्यक्ष दुर्गा रायमाझी, पूर्व अध्यक्ष चन्द्र शर्मा, सल्लाहकार पृथ्बी थकाली, केन्द्रिय कोषाध्यक्ष अमृत अधिकारी, केन्द्रिय सचिव पिएन सापकोटा, केन्द्रिय सह सचिव राज कुमार रायमाझी, केन्द्रिय सदस्य सुजन लम्साल लगायत कलाकार र पत्रकारहरुको उपस्थिति रहेको थियो ।
‘आठौं राष्ट्रिय लोक दोहोरी अवार्ड – २०८०’ लाई सभ्य तथा भब्य रुपमा सफल पारिदिन आयोजक कमिटीका अध्यक्ष अर्जुन थापा मगरले अनुरोध गर्दै अग्रज कलाकार र पत्रकारलाई प्रतिस्पर्धा नगराएर सिधै सम्मान गर्न लागिएको कुरा पनि जानकारी गराए । पत्रकार सम्मेलनको कार्यक्रम सञ्चलान उपत्यका समन्वय समितिका सचिव रमेश बाबु थापाले गरेका थिए ।
