-तुलसी गिरी ‘भावुक’
वरिष्ठ गायक सीताराम पोखरेल ‘रेडियो प्रसार सेवा विकाश समिति’ को बोर्ड सदस्यमा नियुक्त भएका छन् l चैत २२ गतेको मन्त्रीस्तरीय निर्णयले उनलाई सो समितिको बोर्ड सदस्यमा २ बर्षका लागि नियुक्त गरेको हो l नियुक्त भएपछि गायक पोखरेलले आफ्नो कार्यकाललाई सार्थक बनाउन मेहेनत र इमान्दारिताका साथ काम गर्ने बताएका छन् l लामो समय आयल निगममा जागिरे जीवन बिताएका पोखरेलले लगभग २ बर्ष अघि निर्देशक पदबाट अवकाश पाएका थिए l
अक्टोबर ४ का दिन जन्मिएका गायक पोखरेल स्कूले जीवनदेखि नै गायनमा सक्रीय थिए भने कलेज प्रवेश गरेपछि साथीहरुको समूह बनाई उनले मुलुकका धेरै ठाउँहरुमा ‘कन्सर्ट’ समेत गरेका थिए l २०४४ सालमा ‘सजाईदियौ जिन्दगी मेरो’ बोलको गीत रेकर्ड गरी औपचारिक रुपमा गायन यात्रा सुरु गरेका उनले सङ्गीतमा डिजिटल युग आउनु अघि हरेक बर्ष आफ्नो जन्मदिनको अवसर पारेर नयाँ गीति एल्बम रिलिज गर्दै आएका थिए l आफ्ना म्युजिक भिडिओहरुमा चलचित्र नायिकाहरुको साथमा आफैं अभिनय समेत गर्ने गरेका कारण पनि तत्कालिन समयमा उनी सधैं चर्चामा रहन्थे l केही समय यता उनको नयाँ एल्बम प्रकाशन नभए पनि उनको गायन यात्रा भने निरन्तर नै चलिरहेको छ l बहुआयामिक पोखरेलले केही साना र ठूला पर्दाका चलचित्रमा समेत अभिनय गरेका छन् l
