-तुलसी गिरी ‘भावुक’
मेलोडी सुल्तानको उपनामले सुविख्यात गायक शिशिर योगी र प्रसिद्ध गायिका शान्तिश्री परियारको युगल स्वरमा रहेको गीत ‘मनै फरर’ को भिडिओ सार्वजनिक भएको छ l गायक योगीकै अफिसियल युट्युब च्यानल Shishir Yogi बाट यो भिडिओ डिजिटल बजारमा आएको हो l शिशिर योगीकै शव्द/सङ्गीतमा रहेको यस गीतमा साहस शाक्यको सङ्गीत संयोजन रहेको छ भने मिक्सिङ्/माष्टरिङ् चन्द्र चौधरीले गरेका हुन् l
गहन एवं गम्भीर भावको गीतका लागि नेपाली सङ्गीत क्षेत्रकै एक निर्विकल्प ‘ब्राण्ड’ को रुपमा स्थापित गायक योगीले लामो समय पछि सरल शव्द र रोमान्टिक भावको गीत ‘मनै फरर’ सार्वजनिक गरेका हुन् l लोक-आधुनिक शैलीमा रहेको यो गीतको भिडिओ निकै मनोरन्जक छ l रोशन विश्वकर्माको कोरियोग्राफी र प्रकाश धितालको निर्देशनमा छायाङ्कन भएको ‘मनै फरर’ को भिडिओ दिनेश पराजुलीले खिचेका हुन् भने यसमा टेकेन्द्र शाहको सम्पादन रहेको छ l
