अथाह प्रेम जाहेर गर्दै शंकर र अञ्जु  

-तुलसी गिरी ‘भावुक’

नेपाली सङ्गीत क्षेत्रकै होनहार कलाकारद्वय शंकर थापा ‘स्माइल’ र अञ्जु पन्तको युगल स्वरमा रहेको गीत ‘तिमीलाई म कति माया गर्छु’ को भिडिओ रिलिज भएको छ l रोमाण्टिक भावको यो गीतको भिडिओ आनामनगरस्थित सिलौटो कटेजमा आज आयोजित एक समारोहमा सार्वजनिक गरिएको हो भने डिजिटल प्लेटफर्म युट्युबमा पनि आजैबाट हेर्न सकिने छ l प्रल्हाद शाहको शब्दरचनामा रहेको यस गीतमा शंकर थापा ‘स्माइल’ कै सङ्गीत छ l जसमा उदयराज पौडेलको सङ्गीत संयोजन, कुमार के.सी. को रेकर्डिङ र अशोक महर्जनको मिक्सिङ/माष्टरिङ रहेको छ l कार्यक्रम सङ्गीत तथा नाट्य प्रज्ञा प्रतिष्ठानकी सदस्य सचिव कुश्मा महराको प्रमुख आतिथ्यतामा सम्पन्न भएको थियो l

सन्तोष राजबाहकको कोरियोग्राफी र माधव शर्माको निर्देशनमा छायाङ्कन भएको यस म्युजिक भिडिओमा लेन र ललना चिमरियाको मनमोहक अभिनय रहेको छ l भिडिओका सिनेमाटोग्राफर नवराज उप्रेती हुन् भने विकाश दाहालले सम्पादन गरेका छन् l गीतमा प्रेमी जोडीले एक अर्काप्रति अथाह प्रेम व्यक्त गरेका छन् l एक अर्कालाई आकाशका तारा भन्दा धेरै र समुन्द्रमा वहने धारा भन्दा अधिक प्रेम गर्ने जोडीले सँगै बाँच्ने-मर्ने वाचा गरेका छन् l लेन र ललनाको जोडीलाई भिडिओमा लोभलाग्दो गरि यसरी देखाईएको छ मानौं यही जोडीलाई हेरेर गीत लेखिएको हो l भिडिओ हेरेपछि कोरियोग्राफी र अभिनयको प्रशंसा नगरी रहन सकिन्न l

शाश्त्रीय होस् या पप अथवा आधुनिक नै किन नहोस् हर प्रकारका गीतमा उत्तिकै कुशलतापूर्वक फरक ढङ्गले सङ्गीत दिन र गाउन सक्ने भर्सटायल सर्जक/कलाकार शंकर थापा ‘स्माइल’ र ‘स्वरकी रानी’को उपनाम पाएकी गायिका अञ्जु पन्तको यो युगल गीतलाई सङ्गीत भण्डारको एउटा यादगार कृतिको रुपमा मूल्याङ्कन गर्न सकिन्छ l केही महिना अघि सम्पन्न रेडियो नेपालको ७३ औं बार्षिकोत्सवको अवसरमा आयोजित देशव्यापी आधुनिक गीत प्रतियोगितामा शंकर थापा ‘स्माइल’ को सङ्गीतमा गीत गाउने गायक/गायिका ममता गुरुङ, मुना ठटाल र सरोज परियार क्रमश: पहिलो, दोस्रो र तेस्रो बिजेता भएका थिए l जुन एउटा दुर्लभ रेकर्ड हो l रेडियो नेपालकै इतिहासमा यस्तो कहिल्यै भएको थिएन l