कीर्तिमानी गीतकार डा. डीआर उपाध्यायको नयाँ गीत ‘तिमीसँग’ को भिडिओ सार्वजनिक भएको छ । बाबुल गिरीको सङ्गीत एवम् म्युजिक एरेञ्ज, बाल गायक जेनिश उप्रेतीको स्वर र गोविन्द सोनीको मिक्सिङ रहेको शाश्त्रीय शैलीको यस गीतको भिडिओ गीतकार उपाध्यायकै युट्युब DR Music & Creations बाट आज सार्वजनिक भएको हो l बाल गायक जेनिश ‘द भ्याइस किड्स नेपाल’ का विजेता हुन् । सानो उमेरमै शाश्त्रीय शैलीको गीत उनले निक्कै मीठो तरिकाले गाएका छन् ।
गीत-सङ्गीत तथा साहित्य सिर्जनाबाट डा. उपाध्यायले थुप्रै विश्व रेकर्ड कायम गरेका छन् । कीर्तिमानी डा. उपाध्यायका २५ एल्बमका सयौँ गीत श्रोता/दर्शकमाझ आईसकेका छन् । यसअघि गीत-सङ्गीत र साहित्यका विविध विधामा ‘गिनिज बुक अफ वर्ल्ड रेकर्ड’ सहित ८० विश्व रेकर्ड कायम गरिसकेका कीर्तिमानी सर्जक उपाध्यायले यही चैत १८ मा थप विश्व कीर्तिमान र आठ गीति एल्बम सार्वजनिक गर्दै छन् ।
यस्तै, उनका ‘बज्रघात’, ‘त्यागी’, ‘भाग्यचक्र’, ‘अपवित्र छाया’, ‘स्वार्थी’, ‘बिटुली’, ‘अतिरिक्त’, ‘दगाबाज’, ‘अधुरो प्रेम’, ‘सपनाकी रानी’, ‘कफी लभ’ र ‘मेरी प्रिया’ जस्ता उपन्यास पाठकमाझ आएका छन् । उनको नयाँ उपन्यास ‘भाइरस लभ’ पनि छिट्टै सार्वजनिक हुने कुरा थाहा भएको छ ।
