करिव दुई वर्षअघि गायक मानस राजले एउटा गीत सार्वजनिक गरे, जसको शीर्षक थियो – भाइरल भैदियो । उक्त गीतको भिडियो हालसम्म करिव तीन करोड पटक हेरिएको छ । फरक भाव र पृथक शैलीको म्युजिक भिडियोका कारण गीत र भिडियो दुबै लोकप्रिय भयो । भिडियामा बाल नृत्याङ्गना दीक्षा ठकुरीदेखि सबिन कार्कीसम्मको आकर्षक नृत्यले दर्शकलाई लोभ्याएको थियो ।
पृथक शैलीको पहिलो गीतका कारण नै साङ्गीतिक क्षेत्रमा स्थापित भएका गायक मानस राज यतिबेला पुनः त्यस्तै शैलीको गीत तथा म्युजिक भिडियो लिएर दर्शकमाझ आएका छन् । ‘मै हुँ हिरो….’ शीर्षकको उक्त गीतमा गायक मानस राजकै शब्द, सङ्गीत तथा स्वर सुन्न सकिन्छ । यो गीतको भिडियो पनि गायक मानस राजले नै निर्देशन गरेका हुन् ।
यसपटक पनि गायक मानस राजले डान्सिङ बिटमै आधारित गीत तयार पारेका छन् । गीतका शब्दले नै हरेक व्यक्तिमा आत्मविश्वास झल्काउँछ, अनि भन्छ – ‘मेरो लागि मैं हुँ हिरो…।’ प्रस्तुत गीतको भिडियोमा भाइरल भैदियो गीतको भिडियोकै बाल नृत्याङ्गना दीक्षा ठकुरीले आकर्षक नृत्य गरेकी छिन् भने बुगीउगीका टप टेन फाइनलिष्ट शुभम भुजेलले पनि उत्कृष्ट नृत्य प्रस्तुत गरेका छन् । ‘यो गीत तथा म्युजिक भिडियोले हरेक व्यक्तिलाई सकारात्मक सन्देश दिन्छ’ गायक मानस राज भन्छन् । गीत तथा भिडियोले दर्शकको मन जित्न सक्ने कुरामा उनी विश्वस्त देखिन्छन् । सङ्गीतकार राजश ईशानद्वारा सङ्गीत संयोजन गरिएको यो गीतलाई प्रदीप जोशीले मिक्सिङ गरेका हुन् । भिडियोमा भने शुभम भुजेलको कोरियोग्राफी छ । ज्ञानेन्द्र शर्माद्वारा छायाङ्कन गरिएको उक्त भिडियोलाई विकास ज्ञवालीले सम्पादन गरेका हुन् ।
‘मैं हुँ हिरो‘ को कभर भिडियो कन्टेष्ट
यसैबीच गायक मानस राजले ‘मैं हुँ हिरो…’ गीतको भिडियो सार्वजनिक गरे लगत्तै यसको कभर भिडियो कन्टेष्ट पनि घोषणा गरेका छन् । त्यसका लागि सहभागी युवा–युवतीहरुले उक्त गीतमा आधारित कभर भिडियो बनाएर आफ्नै यूट्युब च्यानलमा अपलोड गर्नु पर्ने छ भने उक्त भिडियोको लिंक गायकलाई इमेल गर्नु पर्ने छ । अक्टोबर ३०, २०१९ सम्म सञ्चालन हुने यो कन्टेष्टका विजेताले गायक मानस राजको आगामी म्युजिक भिडियोमा फिचर हुने मौका पाउने छन् । यो प्रतियोगिताको नजिता डिसेम्बर ३०, २०१९ का दिन सार्वजनिक गरिने गायक मानस राजले बताएका छन् ।कभर भिडियोको लिंक manasraj01@gmail.com मा पठाउनु पर्ने छ ।
यस्तो छ भिडियो
