पहिलोपटक भियतनाममा छायाङ्कन गरिएको चलचित्र ‘लभ स्टेशन’ को गीत ‘घाम जून चाहिँदैन’ को भिडियो सार्वजनिक भएको छ । जसमा लिली बिलीको जोडी प्रदीप खड्का र जसिता गुरुङको अभिनय रहेको छ । प्रेमगीत भएकोले प्रणय दिवस (भ्यालेन्टाईन डे) पारेर गीतको भिडियो सार्वजनिक गरिएको बताइएको छ । चलचित्र आगामी २२ गतेबाट देशभरका सिनेमा हलमा लाग्ने जानकारी प्राप्त भएको छ । दीपक शर्माको शब्द तथा सङ्गीत रहेको यस गीतमा सुगम पोख्रेल र रेश्मा पुन मगरले स्वर दिएका छन् ।
छायाङ्कनको हिसाबले गीतको भिडियो निकै सुन्दर बनेको जानकारी गराउँदै चलचित्रका प्रस्तुतकर्ता गोविन्द शाही भन्छन् – ‘भियतनामको विश्वभर चर्चित लोकेशन दानाङ, बाना हिल, ड्राईगन ब्रिज, हालम्बे, हानोई र इन्डोनेशियाको बालीमा यो गीतको छायाङ्कन गरिएको हो । यी लेकेशनमा दर्जनौं हलिउड मुभीहरु समेत छायाङ्कन भईसकेका छन् । गीतको माग अनुसार नै यो सुन्दर ठाउँमा छायाङ्कन गरिएको हो ।’
अभिनेता प्रदीप खड्काले चलचित्र रिलिजको लागि ५१ दिन मात्र बाँकी भएकाले यो प्रेमगीतलाई प्रणय दिवसको अवसर पारेर रिलिज गरिएको जानकारी गराए । ‘यो पारिवारिक प्रेम कथासँगै ‘लस्ट एन्ड फाउन्ड’ स्टोरीमा आधारित रहेको चलचित्र हो’अभिनेता प्रदीपले भने । उज्ज्वल घिमिरेको निर्देशन रहेको यस चलचित्रमा प्रदिप र जसितासँगै रमेश बुढाथोकी, प्रकाश शाह, रेशु भट्टराई, विनोद कुमार पौड्याल, प्रिया रिजाल, सरु बिष्ट, रवि डंगोल, दिनेश काफ्ले, कालु राना लगायतका कलाकारको अभिनय रहेको छ । काफिया फिल्मस्को व्यानरमा काफिया शाही (क्रिसु) र कविर विक्रम शाहीले निर्माण गरेको यस चलचित्रको निर्माण नियन्त्रकमा राजेन्द्र रावल र छ्याकारमा आलोक शुक्ला रहेका छन् । चलचित्रमा शम्भुजीत बासकोटा, दीपक शर्मा, राजनराज शिवाकोटी र एलिश कार्कीले सङ्गीत दिएका छन् ।
