इटहरी/ नेपालीसुगम संगीतका चर्चित गायक प्रमोद खरेलको आवाजमा रहेको मर्मस्पर्शी गीतको म्युजिक भिडियो सार्वजनिक भएको छ । कोशी पूर्वको ईटहरि र मोरंगको वृन्दावन गौशालाको रमणीय स्थानहरुमा छायांकन भएको यस गीतको भिडियोमा प्रेम पीडालाई प्रस्तुत गरिएको छ । ‘पैले माया’ बोलको गीतलाई गीतकार सालिक ओली क्षेत्रीले लेखेका हुन् । गीतमा रमेश श्रेष्ठको संगीत रहेको छ भने सन्दिप कार्कीले एरेन्ज गरेका छन् ।
गीतको भिडियोमा रोहित घिमिरे, पूजा दाहाल र विनोद घिमिरेले अभिनय गरेका छन् । रोहितको अभिनयमा यो दोश्रो म्युजिक भिडियो हो भने विनोद र पूजा यसै भिडियो मार्फत भिडियो मोडलिङ्गमा प्रवेश गरेका छन् । गीतकार समेत रहेका रोहितले यसअघि प्रमोद खरेलको आवाजमा आफ्नै शब्द राखेर ‘सँगै जिउने मर्ने कसम’ बोलको गीतको भिडियोमा समेत आफैले अभिनय गरेका थिए । हेर्नुस् भिडियो
भिडियोलाई परिकला मिडिया प्रालिको प्रस्तुतिमा सुवास संकल्पले निर्देशन गरेका हुन् । संकल्प सुनसरीको ईटहरीमा विगत लामो समयदेखि रंग मिडियाकर्मीका रुपमा कला र मनोरन्जन विधामा रहेर काम गरिरहेका छन् । सार्वजनिक भिडियोको कन्सेप्ट उनैले तयार गरेका हुन् । भिडियोमा मार्टिना मेकअप स्टुडियो ईटहरीकी उर्वी श्रेष्ठले मेकअप गरेकी छिन् भने सुमन तामांगले क्यामेरा तथा ड्रोन चलाएका छन् । भिडियोलाई पवन सुस्लिङ्गले सम्पादन गरेका हुन् ।
