गायक संजीव कुमार पौडेल हृदयस्पर्शी, मार्मिक र सन्देशमूलक गीत ‘त्यो धर्तीको माटोले’ को भिडिओ लिएर आएका छन् । भिडिओ उनको आफ्नै अफिसियल युट्युब च्यानल Sanjib Kumar Paudel बाट एकदिन अघि डिजिटल बजारमा आएको हो l डी. पी. भरेलीको शब्द र संजीव स्वयमको सङ्गीत/स्वर रहेको यस गीतमा महाराज थापाले सङ्गीत संयोजन गरेका छन् भने प्रकाश मिश्रको मिक्सिङ/माष्टरिङ रहेको छ l विक्रम चौहानको निर्देशनमा निर्मित यस म्युजिक भिडिओमा राजु भण्डारी र जुना कार्कीले अभिनय गरेका छन् l
साङ्गीतिक इतिहासमा आफ्नो नाम लेख्ने सपना बोकी सङ्गीतलाई पूजा मानी, त्यसको सेवा हेतु नवलपरासी जिल्लाबाट काठमाडौं आएका संजीव कुमार पौडेलले आफ्नो पहिलो एल्बम ‘अठोट’ देखि यात्रा सुरु गरेर अस्तित्व, अतृप्त जस्ता एल्बम निकालेका छन् भने उनका केही गीत फुटकर रुपमा पनि आएका छन् l बीचमा केही समय आफ्ना समर्थक सामु नबाहिरिए पनि यस क्षेत्रमा नियमित रियाजका साथै कडा मेहेनत गर्दै आफूलाई अझ निखारिरहेको कुरा उनी बताउँछन् ।
सुन्दर भविष्यको आशा बोकेर विदेश पलायन हुने संस्कृतिलाई केन्द्र बनाएर सिर्जना गरिएको यस गीतमा बाध्यताले आफ्नो देश छोडेर परदेश जानुपरे पनि नेपाल, यहाँको भूमि र यहाँ रहेका यादहरुले मनमा सधैं आँधी चलिरहने भाव व्यक्त गरिएको छ l परदेशमा रहेको देशप्रेमी पात्रको मनको रोदन र वेदना गायक पौडेलको मधुर स्वरमा जीवन्त बनेको छ l
