मनले स्वीकार्न नसकेको प्रेम वियोगमा गीतकार तारा

-तुलसी गिरी ‘भावुक’

बहुआयामिक सर्जक तारा अधिकारीको शब्दरचनामा रहेको गीत ‘संयोग’ को भिडिओ सार्वजनिक भएको छ l गीतकार अधिकारीकै अफिसियल युट्युब च्यानल Sunaulo Tara Motion Pictures नामक युट्युब च्यानलबाट मङ्गलबार भिडिओ डिजिटल बजारमा आएको हो l विशेषगरि शास्त्रीय शैलीका गीतका लागि फरक र विशिष्ट पहिचान स्थापित गरेका सङ्गीतकार तथा सङ्गीत संयोजक किरण कँडेलको सङ्गीत/सङ्गीत संयोजन रहेको यस गीतमा लोकप्रिय गायक सत्यराज आचार्यले स्वर दिएका छन् भने गीतको रेकर्डिङ्/मिक्सिङ शम्भु कुमार तण्डुकारले गरेका हुन् l

‘संयोग’ को भिडिओ गीतकार तारा अधिकारीकै निर्देशनमा छायाङ्कन भएको हो भने ‘सुनौलो तारा मोशन पिक्चर्स’को पोष्ट प्रोडक्सनमा निर्मित यस भिडिओमा शिव ढकालको सिनेम्याटोग्राफी र नहकुल खड्काको सम्पादन रहेको छ l गीतकारको रुपमा सङ्गीत क्षेत्रमा उदाएकी सर्जक तारा अधिकारीलाई पछिल्लो समय म्युजिक भिडिओ निर्देशन र अभिनयमा पनि उत्तिकै प्रखर रुपमा देखिएको छ l ‘संयोग’ उनको निर्देशनमा तयार भएको चौथो म्युजिक भिडिओ हो l

रचनात्मक विशिष्टता र भावाभिव्यक्तिको उच्चतम् शिल्प प्रयोग भएको यस गीतलाई सङ्गीतकार कँडेलले शाश्त्रीय शैलीको मनमोहक मेलोडीले सिङ्गारेका छन् भने सत्यराजको आवाजले गीतमा प्राण भरेको छ l टिकटक डान्सरहरुलाई आकर्षित गर्न नसके पनि असल श्रोता लक्षित यो गीत सङ्गीतको मिठास र भाव गहिराईमा डुबुल्की मार्न चाहनेहरुको लागि एउटा अनमोल उपहार हुन सक्छ l शब्द, सङ्गीत र गायनको सुन्दर तादात्म्य मिलेको यस गीतमा नियति, भाग्य वा संयोगको बहानामा मनले स्वीकार्न नसकेको प्रेम वियोगलाई उजागर पारिएको छ l गीतमा प्रेमको कोपिला फक्रन नपाउँदै कसैद्वारा निमोठिएको र आकस्मिक रुपमा भएको त्यो असह्य पीडाबाट उत्पन्न मानसिक अवस्थालाई गहिरो ढङ्गमा पोखिएको छ l रेडियो नेपालको स्टुडियोमा छायाङ्कन गरिएको यो भिडिओ लाइभ प्रस्तुतिको रुपमा आएको छ भने भिडिओमा गायक सत्यराज, सङ्गीतकार/सङ्गीत संयोजक किरण कँडेल लगायतले अभिनय गरेका छन् l