लोकप्रिय गायक सन्जिब पराजुलीले आफ्नो नयाँ गीत ‘आज मनको कुरा तिमीलाई केही भन्नु छ’ को भिडियो सार्वजनिक गरेका छन् l प्रसिद्ध डान्स समूह ‘द कार्टुनज् क्रिउ’ को डान्स स्टुडियो, सामाखुशीमा पत्रकार सम्मेलनको आयोजना गरी सो म्युजिक भिडियो सार्वजनिक गरिएको हो l डान्स शैलीका भिडियो मार्फत लोकप्रियताको शिखर चुमिरहेको ‘द कार्टुनज् क्रिउ’ को यो पहिलो फरक शैलीको भिडियो भएको जानकारी प्राप्त भएको छ l भिडियोमा एकतर्फी प्रेमले हद पार गर्दा त्यसबाट निम्तिएको दुष्परिणामलाई निक्कै आकर्षक ढङ्गमा प्रस्तुत गरिएको छ l यो भिडियोले ‘द कार्टुनज् क्रिउ’ डान्स शैलीको भिडियोमा जति अब्बल छ कथात्मक शैलीका भिडियोमा पनि त्यत्तिकै सिर्जनशील छ भन्ने कुरा प्रमाणित गरिदिएको छ l भिडियोका परिकल्पनाकार एवं निर्देशक डान्स समूहका प्रमुख सरोज अधिकारी हुन् l
कमल खत्रीको शब्द तथा सङ्गीत रहेको यस गीतको म्युजिक एरेन्जर रिकेश गुरुङले गरेका हुन् भने भिडियो ज्ञानेन्द्र शर्मा हुमागाईंको छायाङ्कन र लाक्पा डी लामाको सम्पादनमा तयार भएको हो l लामो समय अघिदेखि अष्ट्रेलिया बसिरहेका गायक सन्जिबका यसअघि ‘नाईं मलाई थाहा छैन, तिमी मलाई मन पर्छ, पहिलो भेटैमा’ लगायतका गीत स्रोताले धेरै मन पराएका छन् l यो समाचार लेखिरहँदा ‘आज मनको कुरा तिमीलाई’ ले अपलोड भएको ३ दिनमै साँढे ८ लाख नजिक नजिक भ्युज पाएको छ भने भिडियो युट्युब ट्रेण्डीङको २ नम्बरमा आउन सफल भएको छ l
Video Link
