काठमाडौं । जय किशन बस्नेत फिल्मस् प्रा.लि.को ब्यानरमा निर्माण भएको चलचित्र ‘धूम ३’ को दोश्रो गीत सार्वजनिक भएको छ । भानुभक्त ढकालको शब्द, ओम सुनारको सङ्गीत तथा सङ्गीतकार सुनारकै साथमा कविता श्रेष्ठको आवाजमा रहेको ‘न्यानो लाग्छ, प्यारो लाग्छ’ बोलको युगल गीतको भिडियो सार्वजनिक भएको हो ।
नायक जय किशन बस्नेतकै लेखन, निर्माण तथा निर्देशन रहेको चलचित्र ‘धूम ३’ को उक्त भिडियोमा नायक बस्नेतको साथमा नायिका एलिना रायमाझीको अनस्क्रिन रोमान्स देख्न सकिन्छ भने कोरियोग्राफी समेत बस्नेत आफैंले गरेका छन् । उक्त भिडियो नेपालको धार्मिक एवम पर्यटकीय स्थल गोसाईंकुण्डमा खिचिएको छ । आफूले हालसम्म निर्माण गरेका चलचित्र मध्ये ‘धूम ३’ प्रति अझ बढी दर्शकहरुको साथ रहनेमा आशावादी रहेको कुरा जय किशन बस्नेतले बताएका छन् ।
यही असोज ५ गतेदेखि देशब्यापी प्रदर्शनको तयारीमा रहेको चलचित्र ‘धूम ३’ को केही हप्ता पहिले मात्र पहिलो गीत ‘तिम्रो हेराईले’ सार्वजनिक गरिएको थियो भने उक्त गीतको भिडियोले पनि प्रशस्त दर्शक पाईरहेको छ । चलचित्रका छायाँकार जीवन श्रेष्ठ हुन् भने अन्य कलाकारहरुको बारेमा ट्रेलर रिलिजको समयमा मात्र जानकारी गराईंने निर्देशक बस्नेतले बताएका छन् ।
