कवि, गीतकार एवं नेपाल प्रतिलिपि अधिकार रजिष्ट्रारको कार्यालयका पूर्व रजिष्ट्रार बिसु कुमार के.सी. को कवितासङ्ग्रह ‘पागल हुन कहाँ सजिलो छ र’ को लोकार्पण गरिएको छ । शुक्रबार कमलादी स्थित नेपाल प्रज्ञा प्रतिष्ठानको सिद्धिचरण हलमा आयोजित एक औपचारिक समारोहमा नेपाली कांग्रेसका महामन्त्री गगन कुमार थापा, वरिष्ठ कवि/गीतकार एवं पूर्व मन्त्री एस्पी कोईराला, वरिष्ठ कवि/गीतकार डा. नवराज लम्साल, कवयित्री सुशीला पौडेल, कवि के.सी. स्वयं लगायतले कृतिको संयुक्त रुपमा लोकार्पण गरेका थिए ।
समारोहमा महामन्त्री गगनकुमार थापाले कविमा मात्र सामान्य विषयलाई असामान्य देख्ने र मिठासयुक्त बनाई पस्कन सक्ने उच्चकोटीको चेत हुने कुरा बताए । कविता लेखन सजिलो कर्म नभई त्यसका लागि गहिरो र गाह्रो साधना आवश्यक पर्ने विचार उनले प्रकट गरे । महामन्त्री थापाले भने, ‘कवि के.सी.का प्रत्येक कविताले प्रश्न जगाउँछन् र मनलाई हलचल गराउँछन् । कृतिमा प्रकृति र समाजका विभिन्न परिवेशसँग जोडिएका विषयवस्तु समेटिएको छ ।’ समाजलाई सही दिशातर्फ सचेत गराउन चोटिलो, धारिलो र सभ्य शब्दको चयन गरेर कविताको ओजलाई कविले अझ खँदिलो तुल्याइएको उनको भनाई थियो ।
कवि/गीतकार एवं पूर्वमन्त्री एस्पी कोइरालाले भाषा, साहित्य, कला र संस्कृतिले देशलाई विश्वमा चिनाउने भएकाले राज्यले यो विधालाई सोही दृष्टिबाट हेर्न आवश्यक रहेको बताए । उनले भने, ‘सामान्य व्यक्तिभन्दा विषयवस्तु हेर्ने र बुझ्ने सन्दर्भमा कविको आँखा फरक हुन्छ । पागल हुने कुनै व्यक्तिको इच्छा नभए पनि कवि के.सी.ले त्यसलाई सटिक ढङ्गबाट इच्छाका रूपमा देखाइदिनुभएको छ । जुन सबैका लागि कौतुहलत़ाको विषय बन्न पुगेको छ ।’
यसैगरि समारोहमा डा. नवराज लम्सालले सामान्यभन्दा फरक, शाश्वत र यथार्थताको वर्णनले कवि र कविता विधालाई बलशाली तुल्याउने धारणा राखे । उनले भने, ‘के.सी.का सृजना नयाँपनयुक्त, सफल, शाश्वत र सफल छन् । मानवीय चेतनालाई फरक ढङ्गले प्रस्तुत गर्ने कला भएको व्यक्ति मात्र कवि हुन सक्छ भन्ने पुष्टि गरेको छ ।’
साहित्यकार सुशीला पौडेलले स्वतन्त्र, स्वच्छन्द, स्वाभाविक र हृदयस्पर्शी विषयवस्तु र शब्दको चयन गरिएरको यस कृतिमा आशावादी चिन्तन रहेको बताइन् । त्यस अवसरमा चलचित्र निर्देशक ज्ञानेन्द्र देउजा, शिखा प्रकाशनका प्रबन्ध निर्देशक पुष्पराज पौडेल र साहित्यकार वियोगी बुढाथोकीले ‘पागल हुन कहाँ सजिलो छ र’ कृतिमा समाज, जीवन र जगतलाई सहज रूपले बुझ्न र बुझाउन सक्ने शब्द र विषयवस्तु समेटिएको बताए ।
लोकार्पण समारोहमा कवयित्री उपमा के.सी. लगायतका साहित्यकारहरुले कृतिभित्रका विभिन्न कविता वाचन गरेका थिए । जिन्दगी र जिन्दगीहरू, प्रकृति र परिवेश, समय र सन्दर्भ, समाज र सास्ती, आफू र आफन्तहरू, माया र मनहरू तथा अन्तमा सहित सात खण्डमा विभाजित उक्त कृतिमा हलुका जिन्दगी, शून्य, सन्ध्या, असल साथी, छाउगोठ, खल्ती, मूर्तिले माया गर्दैन र अलप हुन पाए लगायतका शीर्षकका कविता रहेका छन् । शिखा बुक्सले प्रकाशन गरेको १ सय ४८ पृष्ठको यस कृतिको मूल्य रु. ४ सय रहेको छ ।
